Kryeministri Edi Rama tha sot se do të zgjidhet përfundimisht çështja e patentave për shqiptarët në Gjermani.
Kryeministri Rama ka diskutuar sot me Kancelaren Angela Merkel edhe për çështjen e patentave të drejtimit të automjeteve në Gjermani, pas kërkesës që i kanë bërë shqiptarët atje.
“Duke qenë se shumë miq më kërkuan që të bisedoj me Kancelaren çështjen e patentave të drejtimit të automjeteve në Gjermani, dua t’u jap lajmin e mirë se në shkurt vjen në Tiranë një ekip i Ministrisë së Transporteve të Gjermanisë për të bërë një raport për Berlinin zyrtar, lidhur pikërisht me këtë proces dhe me këtë kërkesë”, tha Kryeministri Rama në përmbledhjen e rezultateve të takimit me Merkel, para kthimit në Atdhe.
Rama shtoi se “kjo është një kërkesë në fakt e kahershme dhe Shqipëria e ka bërë disa herë, por duke qenë se mikun në Berlin e kemi më të fortë se kurrë, unë kam besim se këtij halli të shqiptarëve në Gjermani po i vjen fundi”. /e.s/
