3 ditë më parë, Gjykata e Posaçme caktoi masën e sigurisë “arrest me burg” për 3 shefa policie. Bëhet fjalë për Shkëlzen Ruska (Komisariati Himarë), Ervis Alisinanaj (Komisariati Lushnje) dhe Elvis Dervishi (shef i Policisë kufitare Sarandë). Ata dyshohen se janë përfshirë në trafik droge, ndërsa gazetari Armand Bajrami deklaroi këtë të Mërkurë në “Opinon” se “ky rast ka zbuluar edhe një herë inkriminimin e segmenteve të caktuara të Policisë së Shtetit.”
Sipas tij, për rastin ka pasur dy hetime paralele të Prokurorisë së Posaçme që në vitin 2022.
“Një hetim që kishte nisur në bazë të të dhënave të ardhura nga Sky ECC të sjella nga Europol dhe një hetim tjetër, me diferencë 6 muaj, bazuar një referimi të Policisë së Shtetit”, u shpreh Bajrami.
Po si janë “zbërthyer” bisedat?
“Është bërë përmes bisedave që ata kanë pasur me njëri-tjetrin. Nga gjëra krejtësisht të zakonshme, përshembull një foto dogane, një nga personat e grupit kriminal i thotë një tjetri po kaloj në doganë. Është verifikuar që pas 45 minutash ai ka kaluar në Qafë-Morinë. Apo kur merr mesazhin e ngushëllimit për babain. Në këtë lloj forme ka dalë gjithë tabloja, edhe pse deri në këto momente prezumohen të pafajshëm, ku 3 zyrtarë policie dhe 1 ish-zyrtar ishin këshilltarë të dy grupeve kriminale. Duke u treguar se si të vepronin, duke i mbajtur të informuar me operacionet policore në Sarandë”, shpjegoi ai.
Kujtojmë se rasti ka të bëjë me goditjen e një grupi kriminal në Sarandë që kultivonte kanabis dhe më pas e trafikonte drejt Greqisë. Në lidhje me ngjarjen është arrestuar edhe një person tjetër, i cili në kohën e kryerjes së veprave penale ka qenë ndër të tjera dhe punonjës policie në Drejtorinë e Forcës Operacionale në Drejtorinë e Përgjithshme të Shtetit.
