Partia Demokratike do të zgjedhë në fillim të këtij viti lidershipin e ri të saj. Pas zgjedhjes së Këshillit të ri Kombëtar, PD-ja do të përmbyllë procesin e riorganizimit me përzgjedhjen e emrave të rinj në funksionet më të larta brenda partisë.
Kreu i P-së Basha mësohet se do të kërkojë mbledhjen e Këshillit Kombëtar për të zgjedhur drejtuesit në funksionet më larta drejtuese. Të gjithë anëtarët e Këshillit Kombëtar të PD-së do të zgjedhin me parimin një anëtar një votë, dy nënkryetarët e partisë, sekretarin e përgjithshëm, sekretarin organizativ, sekretarin për Burimet Njerëzore, sekretarin për Çështjet Zgjedhore, sekretarin për Aksionin Qytetar dhe sekretarin për Ekonominë. Për secilin post, pritet që të propozohen minimalisht dy kandidatura, të cilat do t’i nënshtrohen votës së anëtarëve të rinj të Këshillit të ri Kombëtar, deputetëve dhe çdo anëtari të përhershëm në këtë strukturë të PD-së.
Në mbledhjen e tij të parë, Këshilli Kombëtar i PD do të zgjedhë edhe kryetarin e ri të saj. Sipas statutit të Partisë Demokratike, në nenin 50, pika 1 e tij, anëtarët e Këshillit të PD-së, në mbledhjen e tyre të parë do të zgjedhin edhe kryetarin e tyre, i cili do të ketë mandat 4-vjeçar.
Kryetari i Këshillit Kombëtar do të koordinojë marrëdhënien mes anëtarëve të Këshillit dhe aksionit të Grupit Parlamentar të PD-së. Gjithashtu, anëtarët e Këshillit do të zgjedhin mes kandidaturave të propozuara, emrat e rinj të lidershipit të PD-së. Pas zgjedhjes së funksionarëve të rinj, Basha do të nisë punën për përzgjedhjen e kandidatëve për zgjedhjet vendore të vitit 2019.
Basha ka premtuar se kandidatët për zgjedhjet vendore nuk do të jenë atribut i tij, por i anëtarësisë së PD-së, e cila do të ketë të gjithë të drejtën të propozojë dhe të zgjedhë kandidatët për kryetarë bashkie./a.meta/javanews.al
