Gjimnazistë të shkollës “Aleksandër Moisiu” në Kavajë, i janë bashkëngjitur nismës së Këshillit të Qarkut Tiranë, “Kinemaja më afër të rinjve”, dhe kanë ndjekur shfaqjen e një filmi në ambientet e Pallatit të Kulturës në këtë qytet.
Nisma e cila ka nisur në muajin dhjetor, ku në bashkëpunim me Qarkun e Tiranës kinematë e kryeqytetit një ditë të javës reduktuan çmimin e biletës për të rinjtë që frekuentojnë ato, ka për qëllim kultivimin e kulturës së kinemasë dhe filmit tek të rinjtë, dhe ofrimin e kësaj mundësie si për ata që jetojnë në Tiranë dhe rrethina, edhe për të rinjtë e të rejat ta që jetojnë qytete apo fshatra të tjera të Qarkut Tiranë.
“Kjo është një dëshirë e mirë për t’i afruar të rinjtë tek filmi,”u shpreh Aldrin Dalipi, Kryetar i Këshillit të Qarkut Tiranë, i pranishëm në këtë event.
Në kuadër të kësaj nisme, në bashkitë e tjera, pjesë e qarkut të Tiranës, ku nuk ka salla kinema, filmat do të vijojnë të projektohen, falas, në ambiente publike të përshtatshme për këtë qëllim duke i vënë këto ambiente në shërbim të të rinjve dhe sjellë në vëmendje të autoriteteve vendore përkatëse, nevojën për investime të kësaj natyre.
“Kjo nismë do të zgjerohet edhe në bashkitë e tjera të Qarkut Tiranë, si Kavaja, Kamza, Vora dhe Rrogozhina. Afrimi me filmin dhe me kinemanë është një vlerë; ju pasuron ditën dhe ju largon nga rutina e padobishme e kafeneve dhe vrasja e kohës së vyer. Të parit e një filmi me mesazh e përmbajtje cilësore, në shoqërinë e bashkëmoshatarëve dhe diskutimi i tij, është diçka e dobishme për ju, dhe është detyra jonë t’ju krijojmë kushtet e t’ju nxitim drejt këtyre lloj aktiviteteve gjithëpërfshirëse”, u shpreh Dalipi.
