Këshilli Bashkiak i Tiranës zhvilloi sot mbledhjen e radhës, ku edhe u miratuan dy vendime shumë të rëndësishme, dhënia e ndihmës ekonomike për familjet në nevojë dhe pagesa për Personat me Aftësi të Kufizuar.
Këshilli miratoi vendimin për dhënien e ndihmës ekonomike për periudhën 1 deri 31 tetor 2015. Një vendim ky që vjen më herët në këshill për të bërë të mundur që të gjitha familjet dhe personat që përfitojnë ndihmë ekonomike ta marrin në kohë atë dhe pa asnjë vonesë.
Në këtë mbledhje u miratua edhe vendimi për ndarjen e pagesës për Personat me Aftësi të Kufizuara dhe Invalidët e Punës për periudhën 1 deri në 31 tetor. Një tjetër vendim ky që i vjen në ndihmë një kategorie të tërë sociale që përfiton mbështetje financiare nga institucionet shtetërore.
Ky vendim do të sjellë përfitime për personat me aftësi të kufizuar, kujdestarët e një personi me aftësi të kufizuar, personat e verbër, kujdestarët e një personi të verbër, paraplegjikët – tetraplegjikët, kujdestarët e një paraplegjiku – tretraplegjiku dhe të gjithë invalidët e punës.
Sipas këtij vendimi që prek 24 njësitë administrative të qytetit të Tiranës, përfitojnë 22.282 Persona me Aftësi të Kufizuar.
Këshilli diskutoi gjithashtu, mbi kërkesën e këshilltarëve të opozitës për dhënien e informacionit me debat me kryetarin e Bashkisë, Erion Veliaj, për disa çështje jashtë rendit të ditës. Kreu i Këshillit Bashkiak, Aldrin Dalipi, pranoi në këtë kërkesë duke lajmëruar se seanca do të zhvillohet në mbledhjen e ardhshme.
