Këshilla falas për kandidatët për ministra

Nga Mero Baze

Ka një furtunë lajmesh të rreme për kabinetin e ri që pritet në javën e dytë të shtatorit. Nuk di të jap ndonjë recetë se çfarë duhet të bëni që të jeni kandidatë, por mund të them çfarë s’duhet të bëni.

Kam parë që kafenetë rrotull Kryeministrisë janë mbushur plot me kandidatë, të cilët mendojnë se nëse i thërret dikush në telefon, duhet të jenë afër Kryeministrisë. Mos humbisni kohë kot, sepse edhe nëse jeni në listë, nuk ju thërret njeri. Do ta dëgjoni në televizione lajmin, kështu që mos harxhoni kohë dhe lekë kot nëpër kafene.

Kam parë disa që dalin në emisione televizive dhe porosisin moderatoren që të thotë: “Kemi dëgjuar që je në listë.” Kjo është një mënyrë tjetër e sigurt që edhe nëse je, të dalësh nga lista. Më shumë më pëlqejnë ata që e shpallin veten si të sigurt në qeveri, por ngrejnë dyshime mbi paparashikueshmërinë e Ramës. Këta janë më novatorë në aplikimin e tyre.

Kam parë disa që janë kthyer nga diaspora dhe kanë blerë kostume të shtrenjta, duke hapur po ashtu fjalë se kanë marrë garanci se do të jenë në qeveri. Nga diaspora kemi një qeveri-hije me kryeministër profesor Pilinci, edhe pse kam konflikt interesi me të, se më ka shkarkuar paraprakisht nga detyra e këshilltarit.

Kemi dhe një kategori tjetër që bezdisin portalet duke futur lajme se si do të jetë qeveria e re, dhe vizatojnë identikitin e tyre si model i ministrit. Fjala vjen: të jetë teknicien i lartë, të ketë përvojë me ligjet e reja të BE-së, apo të jetë i shkolluar mirë. Po i ke gjithë këto cilësi, mos i prish për t’u bërë ministër.

Pastaj vjen radha e gazetarëve të “informuar nga brenda”, që “të shkatërrojnë nervat” me tituj bombastikë:

“Ja si do jetë qeveria e re!” E lexon dhe shikon që “zbulimi” që kanë bërë, është se në qeverinë e re do ketë edhe disa ministra të vjetër,  edhe disa ministra të rinj. Këta janë parashikues të sigurt.

Një tjetër tip gazetarësh rrëfejnë vetëm për ata që do jenë përsëri ministra dhe i quajnë “pesha të rënda” që pa ata nuk bëhet qeveria. Derisa nuk përmendin emra, edhe ata janë të sigurt në suksesin e tyre, pasi ata që mbeten, do quhen “pesha të rënda”.

Pastaj janë ata që vizatojnë “klanet” brenda PS-së dhe analizojnë lëvizjet e Edi Ramës, se si do zhdukë një klan e do ngrejë tjetrin, apo si do t’i balancojë klanet. Këta janë të vlefshëm për të rregulluar humorin e Edi Ramës në këto ditë të lodhshme. ( I vetmi që e ka të sigurt është Ulsiu, ngaqë e kam sulmuar unë. Madje futja si personazh tek “Antena”, do t’i hap rrugë dhe karrierës në parti, si Mulit.)

Të tjerë gazetarë vizatojnë ministra të rinj, që do jenë edhe nga PD-ja. Kjo ka shkaktuar një turbullirë politike, pasi për herë të parë, Asamblenë e PS-së e pret me më shumë ankth PD-ja sesa vetë PS-ja, e cila e ka ndarë mendjen që ka të sigurt në qeveri vetëm Edi Ramën. Por PD-ja me gjithë ato halle nuk e ka këtë borxh dhe këtë turbullirë. Lerini në hallin që i ka gjetur.

Ka edhe shembuj të tjerë “aplikimesh”, por nuk po zgjatem. E përbashkëta e të gjithë këtyre që përmenda është: nuk bëhesh ministër nëse vetëshpallesh apo kërkon të të shpallin.

Është më mirë të shtyjnë pushimet deri më 12 shtator, dhe pastaj çfarë fati të kenë. Nuk është ndonjë fat i madh dhe po u bën ministra. Pyesni pak ku janë ata që ishin ministra më parë, për të kuptuar se ndoshta është më mirë mos ta dëgjojnë emrin më 12 shtator.