Nikoll Lesi “këshillon” Edi Ramën nëpërmjet gazetës së tij “Koha Jonë”, që të mos investohet kot tek Shpëtim Idrizi dhe PDIU.
Kjo, pasi sipas tij, PDIU nuk mund të marrë më shumë se 3 deputetë në zgjedhjet e ardhshme.
Për këtë arsye, në shkrim Rama “këshillohet” që të shtrëngojë fort LSI-në
“Edi Rama ka shumë muaj që bën sforco të madhe për të ngritur një kështjellë çamërie, e cila nuk arrin dot të bëhet as kodër në politikë, pasi kaq është takati i kësaj force.
Shpëtim Idrizi e ka ngritur në pikën e mundshme më të lartë partinë e çamëve, por nuk ka më “beton” për ta lartësuar si ndërtesë. Kaq elektorat real kanë, aq sa, e shumta mundet të marrin katër deputet me “miellin” e tyre.
Votat e tjera me anë emërimesh, pazaresh, drejtorash apo tenderime nuk e kapin numrin 5 deputetëve. Me çdo llogari nuk kalojnë numrin pesë, ndonëse për të qenë realist, PDIU-ja nuk e kalon numrin tre në zgjedhjet e ardhshme, duke shtuar edhe mbërritjen e karizmatikes dhe deputetes VIP, Mesila Doda nga PD-ja.
Ndaj synimi i Ramës për të mbushur boshllëkun që mund të lërë LSI-ja në rast prishje koalicioni, apo mosfirmosje për zgjedhjet e tjera, kurrsesi nuk e mbush dot me PDIU-në. Më mirë të investojë në arritjen e një marrëveshjeje të re e të mirëpërcaktuar me LSI-në, edhe duke sakrifikuar pushtet për të bërë Shtet, siç i pëlqen Ramës të deklamojë, se sa t’i futet punës stërmunduese për të ngritur kështjella rëre çame.
Çamët janë një komunitet i shkëlqyer dhe patriot, porse e dinë mirë se PDIU-ja nuk është një parti kombëtare, porse krejtësisht komunitare. Fjalimet sajohen si të duash se kemi vota e degë kudo në Shqipëri, bile edhe në Kosovë, porse PS-ja më mirë t’ua jaë njerëzve të vet këto poste e detyra, se sa investon për të mosinvestueshmen PDIU.
Shpëtim Idrizi është mjeshtër dhe politikan dinak, ndaj edhe ai e di mirë se më mirë me parimin “të marrim ç’të marrim sot, se sa të presim mot”. Dhe nuk i ka dalë keq. E keqja ka mbetur për socialistët. Nuk kanë mbajtur premtimin për socialistët. Edhe socialistët duan punë, poste, shëtitje, etj. Jo vetëm çamët, duke i mbajtur sikur po bëjnë “vezën e artë”.
“Vezën” e artë e bën vetëm Kryeministri, ndaj mbajtja nën “klloçkë” e PDIU-së është humbje kohe”, thuhet në shkrimin e gazetës së Lesit.
KohaJonë/d.i.
