Gjykata e Tiranës ka caktuar sot masën e sigurisë “Arrest me burg” për sekserin e Universitetit Bujqësor në Tiranë, Besim Nasufi, që u kap ‘mat’ teksa kërkonte para dhe favore seksuale në këmbim të marrjes së provimeve.
Në seancën e sotme, ai nuk ka folur asnjë fjalë, kurse avokati mbrojtës ka thënë se prokuroria nuk ka prova për ryshfetin dhe as për lidhjet me pedagogët që janë përmendur në emision.
Në emisionin investigativ, “Fiks fare” u transmetuan bisedat që ai bënte me vajzën e emisionit. Ai u prangos pas denoncimit të rastit, ndërkohë që gruaja një ditë më pas i doli në krah, duke e quajtur kurth gjithë sa u transmetua.
Sekseri nuk u mjaftua vetëm me paratë, pasi ai kërkonte dhe favore seksuale në këmbim të notës kaluese dhe gjetjes së një pune. Pas disa takimesh me gazetarët e Fiksit, Nasufi kërkon që njëra nga bashkëpunëtoret e emisionit investigativ të bëhet e dashura e tij.
“Pse të thashë nga ora 9 unë? Që të rri pak qetë. Të rri pak qetë me ty. Se tashi unë ty të kam shoqe. Me vete nuk do ta marr ty unë plaçkën. Aty e ke. Edhe burri për shembull, s’ka për ta marrë vesh burri, në punë është ai. Se mos ka për ta marrë vesh burri, aty e ke”, i drejtohet ai bashkëpunëtores së Fiks Fare, duke shtuar se nuk ka rëndësi nderi pasi me të do të shëtisë botën.
“Unë kam qënë në Francë. Njësoj është gjithandej. Burri është në punë, burri është atje, ti këtu. Kush do ta marrë vesh? Pastaj është një orë e caktuar. Për shembull nuk është një orë që ka shumë, nuk ka njerëz. Ne s’kemi për të ndenjur 4 orë, 5 orë”, vijon ngacmimin përgjegjësi i fakultetit.
Më tej, ai thotë se një të dashur që ka patur në fakultetin ku është përgejgjës, e ka futur në punë te Zooteknika dhe një tjetër e ka çuar në Gjermani nëpërmjet universitetit, pasi është i vetmi që njihet në disa vende të botës.
