Një 20-vjeçar shqiptar, i cili është person i dyshuar si i përfshirë në vrasjen e 19-vjeçarit grek Alkis në Selanik më 1 Shkurt, është arratisur nga Greqia.
Ai dyshohet se është bashkëpunëtori i 23-vjeçarit shqiptar, ky i fundit i arrestuar tashmë nga autoritetet greke.
Ata goditën me mjete prerëse 19-vjeçarin, një tifoz i skuadrës Aris në Selanik. Ndërsa dy shqiptarët dhe bashkëpunëtorët e tyre të tjerë, grekë e shqiptarë, konsiderohen dhe njihen në Greqi si pjesë e tifozërive huligane.
Sipas mediave të Athinës, 20-vjeçari shqiptar me iniciale D.R. është arratisur drejt Shqipërisë që më datë 2 Shkurt. Televizioni “Mega” raporton se i riu u largua nga Greqia një ditë pas sulmit ndaj 19-vjeçarit Alkis, i cili mbeti i vdekur.
Sipas të dhënave, 20-vjeçari kaloi kufirin greko-shqiptar me makinë rreth orës 23:45 të datës 2 Shkurt. Deri në atë moment, ndaj tij nuk ishte lëshuar asnjë urdhër-arresti nga autoritetet greke. Për momentin nuk dihet asgjë rreth vendndodhjes së tij.
Dy të rinjtë nga Shqipëria, 20-vjeçari dhe 23-vjeçari, janë tifozë të skuadrës së PAOK në Greqi dhe pjesë e grupeve huligane.
Të dy njihen nga policia e Selanikut, pasi edhe në vitin 2019 kanë qenë të përfshirë në një ngjarje të ngjashme, kur sulmuan dhe plagosën me thika dy persona të cilët janë miqtë e Alkis, 19-vjeçarit që u vra në fillim të Shkurtit 2022.
Ndërkohë, 23-vjeçari shqiptar që është i arrestuar nuk e pranon vrasjen dhe nuk pranon të bashkëpunojë për të treguar bashkëpunëtorët e tjerë. Megjithatë, policia greke e konsideron atë vrasës të dyshuar në bazë të disa pamjeve të sigurisë, të cilat janë publikuar edhe në media.
/a.r
