Kërkesa e Presidentit të Turqisë Rexhep Tayyip Erdogan në Tiranë për të mbyllur shkollat e rivalit të tij Fetullah Gylen, dalëngadalë po marrin përgjigje nga të gjithë krerët e lartë të shtetit.
Pas Ministres së Arsimit, Ministrit të Brendshëm, Presidentit, këtë radhë ka qenë Kreu i Kuvendit Ilir Meta që ka komentuar kërkesën e Erdogan.
Nga Kryesia e Kuvendit, kryeparlametari tha se deklaratat nuk kanë lidhje me marrëdhëniet mes dy vendeve, ndërasa i ka quajtur raportet me Turqinë, historike.
“Raportet midis Shqipërisë dhe Turqisë janë historike dhe janë me shumë të ardhmen. Në këtë drejtim unë besoj se duhen ndarë ato që janë prioritete të përbashkëta të bashkëpunimit të cilat ne i mbështesim dhe i inkurajojmë edhe në vijim të traditës së shkëlqyer të marrëdhënieve midis dy vendeve me qëndrime të caktuara, të cilat në fakt nuk kanë një lidhje të drejtpërdrejtë me marrëdhëniet mjaft solide midis dy vendeve. Ndërsa për çështjen në fjalë besoj se përgjigja e Ministres së Arsimit është përgjigja më adekuate.” tha kreu i Kuvendit.
Meta u ndal edhe në krizën në Maqedoni ku theksoi se partitë shqiptarë atje duhet të forcojnë konsensusin në funksion të të drejtave të shqiptarëve.
“Maqedonisë, në mënyrë që përmes këtij procesi politik shqiptarët në Maqedoni të kenë të drejta krejtësisht të barabarta me gjithë qytetarët e tjerë të Maqedonisë, sepse kjo e bën Maqedoninë një vend më evropian dhe më demokratik, por kjo e bën edhe një vend shumë më të sigurt dhe shumë më të stabilizuar. Dhe në këtë drejtim ne e shpresojmë dhe inkurajojmë të gjitha forcat politike shqiptare pavarësisht nga dallimet e ngushta partiake apo politike që ato kanë që të vijojnë bashkëpunimin e tyre.” u shpreh Meta.
