Edhe java e dytë e shtatorit nuk ka sjellë ndonjë të re lidhur me verifikimin e statusit të dëshmorit, invalidit, veteranit, pjesëtarit apo të internuarit të Ushtrisë Çlirimtare të Kosovës
Ndonëse premtimi i fundit ishte se deri në fund të gushtit do të publikohen listat përfundimtare, njohës të afërt me procesin thonë se nuk ka gjasa që kjo të ndodh, madje as që mund të përmendin ndonjë afat. Xhavit Jashari, përfaqësues i organizatave të dala nga lufta e UÇK-së, ka deklaruar për “KosovaLive” se një gjë e tillë duhet të ndodhë brenda shtatorit në të kundërtën do të organizojnë protesta. “Ky proces duhet përfundojë brenda shtatorit në të kundërtën na detyrojnë që të marrim masa qoftë me protesta qoftë në mënyra tjera sepse është koha që veteranët t’i gëzojnë të drejtat e tyre. Është duke u punuar në shqyrtimin e ankesave, certifikatat i kanë marrë ato rastet që nuk kanë qenë kontestuese dhe shumica e ankesave nëpër zona janë kryer. Kështu që, edhe udhëzimi administrativ nga Komisioni është përgatitur dhe po presim shumë shpejt, gjatë këtyre ditëve sipas premtimeve që i ka dhënë edhe kryeministri në takim me Agim Çekun dhe Faik Fazliu që të lëshohet ky udhëzim dhe veteranët të aplikojnë për të drejtat e tyre”, ka theksuar Jashari.
