Drejtori i Përgjithshëm i Policisë, Haki Çako, është dëshmitari i radhës i thirrur në Prokurorinë e Krimeve të Rënda, për të dhënë deklarime në hetimin ndaj Emiljano Shullazit.
Burime të gazetës “Panorama” nga Prokuroria e Krimeve të Rënda konfirmuan dje se kreut të Policisë i është kërkuar të paraqitet për të dhënë deklarime në lidhje me çështjen e kërcënimit të rektorëve Mynir Koni dhe Dhori Kule, në prill të vitit 2016. Të njëjtat burime të konfirmuara nga hetimi kanë thënë se vendimi për thirrjen e drejtorit të Policisë së Shtetit, Haki Çako, në cilësinë e deklaruesit, është marrë pas administrimit të deklarimeve të Saimir Tahirit dhe Ervin Hodajt. Ish-ministri i Brendshëm u mor në pyetje të premten nga dy prokurorët e çështjes për rreth 30 minuta.
Ai ka dëshmuar në Prokurori se kishte marrë dijeni për kërcënimin e profesorëve, të cilët sipas Tahirit nuk kanë përmendur emra në lidhje me autorët e kanosjes që ndodhi në fushatën për zgjedhjet në universitete. Tahiri ka thënë se pasi është njohur me rastin, ka porositur Drejtorin e Përgjithshëm të Policisë Haki Çako për të ndjekur çështjen, duke kërkuar nga Policia zbardhjen e ngjarjes. Burimet nga hetimi thonë se pikërisht për këtë pjesë të deklarimit të Tahirit, është vendosur të thirret për t’u marrë në pyetje Drejtori i Përgjithshëm i Policisë, Haki Çako.
HETIMI
Dëshmia e tij, sipas hetuesve, është e nevojshme edhe për shkak të sqarimeve që ka dhënë në Prokurori dy javë më parë drejtori i Policisë së Tiranës, Ervin Hodaj. Ky i fundit është pyetur nga Prokuroria në lidhje me ngjarjen e kërcënimit të profesorëve, por edhe për momentin e shoqërimit të Emiljano Shullazit në Polici, në mesin e muajit prill 2016. Të premten, Prokuroria e Krimeve të Rënda mori në pyetje edhe ministren e Arsimit, Lindita Nikolla, e cila dha deklarime për sa dijeni ka pasur në lidhje me kanosjen e dy profesorëve. Këta të fundit nuk e kanë përmendur Emiljano Shullazin në asnjë rast gjatë deklarimeve të tyre në Polici dhe Prokurori, duke thënë se nuk kanë arritur t’i identifikojnë autorët e kanosjes. Ndërkaq, pak ditë pas ngjarjes së ndodhur në prill 2016, Prokuroria e Krimeve të Rënda arrestoi Emiljano Shullazin, Blerim Shullazin e Gilmano Danin, me akuzën për këtë ngjarje, por edhe për tri raste gjobëvëniesh ndaj biznesmenëve të ndryshëm, në Tiranë dhe në Durrës. Avokatët e Shullazit nuk i kanë pranuar asnjëherë këto akuza, duke i hedhur poshtë ato.
