Një sulm ajror izraelit shkatërroi pjesë të spitalit Al-Ahli, i fundit spital ende funksional në qytetin e Gazës.
Dëshmitarë thanë se bombardimet kishin shkatërruar repartet e terapisë intensive dhe kirurgjikale, ndërsa video të shfaqura online treguan flakë e tym që ngriheshin në qiell pasi raketat qëlluan godinën dykatëshe, shkruan A2.
Dhjetëra njerëz, përfshirë pacientë të shtruar në spital, e gjithashtu gra e fëmijë të strehuar në oborrin e spitalit, u panë teksa vraponin larg zonës së goditur. Sipas shërbimeve të Emergjencës Civile në Gaza nuk pati viktima si pasojë e sulmit. Forcat e mbrojtjes izraelite pretendojnë së shënjestruan spitalin pasi strehonte një qendër komande dhe kontrolli të përdorur nga Hamas.
Siç thuhet në një deklaratë, IDF ka marrë të gjitha hapat për të minimizuar dëmet ndaj civilëve përfshirë duke lëshuar paralajmërime në zonë, e duke përdorur municione të precizionit të lartë dhe survejim ajror.
Një gazetar lokal që po punonte në spital tha se IDF kishte telefonuar një mjek që po operonte në urgjencë dhe i kishte kërkuar të evakuonte spitalin menjëherë. “Keni 20 minuata për të ikur”, citon gazetari paralajmërimin e forcave izraelite të mbrojtjes.
Në një deklaratë, Hamas e dënoi sulmin, duke e quajtur krim të tmerrshëm. Gati 51 mijë palestinezë janë vrarë që prej nisjes së luftës mes Izraelit dhe Hamasit më 7 tetor të 2023-shit, mbi 1500 prej të cilëve që prej 18 marsit kur Izraeli rifilloi ofensivën pas një armëpushimi disa javor.
