Komentatori i futbollit, Kostandin Grillo, ka qenë njeriu që është angazhuar me ardhjen e Mario Kempesit si trajner i Lushnjës më 1996. Në një intervistë me Panorama Sport, Grillo ka hedhur poshtë si të pavërteta dhe qesharake pretendimet e ish-kampionit argjentinas se Lushnja kërkoi të merrte goleadorin e Fiorentinës, Gabriel Batistuta. Kempes është shprehur se presidenti Xhaferri donte lojtarin e skuadrës italiane, që në atë kohë ishte në kulmin e tij. E paimagjinueshme dhe pikërisht këtë thekson Grillo.
“Kam lexuar pak ditë më parë se Kempes ka thënë në mediat rumune që negocioi me Batistutën për ta sjellë te Lushnja. Mendoj se është më shumë një histori qesharake, ose më saktë trillim. Për sa kohë që ka qëndruar në Lushnjë, Kempesi nuk e ka përmendur kurrë emrin e Batistutës, që në atë periudhë ka qenë një lojtar shumë i njohur. Në bisedat që kemi bërë, nuk ka pasur ndonjë rast që të shfrenonte fantazinë për lojtarë të tillë, që sigurisht nuk mund të linin Serinë A për të ardhur në Lushnjë”, thotë Grillo.
Por, ai pohon se Xhaferri u përpoq jashtë mase të merrte nihgerianin Okocha, gjithashtu ndër më të mirët në atë kohë, por pa pasur sukses.
