Kreu i bashkisë së Kievit, Vitali Klitschko, i cili ka udhëtuar nëpër botë duke përfaqësuar vendin e tij si boksier i Hall of Fame, tani është “shumë krenar që është ukrainas”.
Në një intervistë për CNN, Klitschko u shpreh: “Kemi qëndruar përballë një prej ushtrive më të forta në botë. Të qenurit shtet i pavarur është prioriteti unë kryesor. Ne po mbrojmë familjet tona, qytetin tonë, vendin tonë dhe të ardhmen tonë.”
Ish-kampioni i botës i boksit në peshat e rënda u bëri thirrje shteteve të tjera që të mbështesin Ukrainën, sepse do e kenë “të vështirë të mbijetojnë” pa të.
Klitschko tha se infrastruktura kryesore, si energjia elektrike, ngrohja dhe uji, në Kiev janë dëmtuar, ndërsa shtoi se autoritetet janë në kontakt me Kryqin e Kuq dhe organizata të tjera humanitare, të cilët kanë dërguar ushqim dhe ndihma.
Por, ajo që me të vërtetë i nevojitet Kievit, tha Klitschko, janë “sanksione më të forta kundër Rusisë”.
“Ne duhet të qëndrojmë të bashkuar. Lufta nuk është vetëm për Ukrainën. Është sfidë për të gjithë botën moderne, për të gjithë botën demokratike”, tha ai.
Kreu i bashkisë akuzoi presidentin rus, Vladimir Putin se po përpiqet të rindërtojë Bashkimin Sovjetik dhe ta bëjë Ukrainën “pjesë e një perandorisë ruse”.
Klitschko tha se ukrainasit do të luftojnë për “çdo shesh” dhe “çdo rrugë” të Kievit nëse forcat ruse përparojnë në qytet.
“Ne presim një luftë të madhe. Por ne po luftojmë për familjet tona”, shtoi ish boksieri.
Ndërsa përfundoi: “Ka një lëvizje të madhe patriotike tani. Mund ta imagjinoni, të moshuar, mjekë, artistë, aktorë nga teatri, nga shumë profesione që nuk kishin pritur kurrë të luftonin, të mbanin armë, por tani ata po vijnë tek ne. Janë gati për të luftuar. Është e mahnitshme.”
g.kosovari
