Ministri i Mbrojtjes, Niko Peleshi deklaroi ditën e sotme se në misionin e NATO-së në Letoni, do të shkojnë 21 efektivë të Forcave të Armatosura.
Ky ishte një nga vendimet e qeverisë që doli nga mbledhja e Këshillit të Ministrave ditën e sotme. Peleshi u shpreh se ky kontribut ka nisur që në vitin 2017 e se Shqipëria ka dërguar gjithsej 200 efektivë.
Ai tha se Shqipëria do të vazhdojë kontributin e NATO-s për këtë pjesë si dhe po vijohet me investimet në rimodelimin e Akademisë së Forcave të Armatosura.
‘Një nga vendimet e marra ishte vendimi për të vijuar kontributin e FA në misionin e NATO-s në Letoni. 21 Efektivë të FA do të shkojnë në një stërvitje. Ky kontribut ka nisur në vitin 2017 dhe atje kemi dërguar gjithsej 200 efektivë.
Letonia është në verilindje të aleancës tonë NATO dhe pozicioni ka si synim përballimin e rrezikut që i vjen aleancës nga vendet e Lindjes. Ne atje kontribuojmë me një specialitet për neutralizimin e municioneve të paplasura. Ne jemi angazhuar në këtë drejtim për të qenë të nevojshëm në kontributin e NATO-s në këtë pjesë. Në rast se fokusohemi më shumë, ne japim një kontribut të paçmuar në NATO. Ne jemi duke u angazhuar dhe në dije.
Mbrojtja kibernetike është një togfjalësh gjithmonë më i përditshëm në çështjet e sigurisë në përgjithësi dhe në këtë kuadër po investojmë te rimodelimi i Akademisë së FA. Jemi duke bashkëpunuar me SHBA. Duam të sjellim modelin amerikan këtu te ne. Një informacion tjetër që do e ndaj është dhe rritja e interesimit të të rinjve tanë për të studiuar pranë FA. Në degët e reja kemi pasur 1 mijë aplikime, në fazën e parë të regjistrimeve. Duam të krijojmë një kampus të FA dhe me mbështetjen e nevojshme do të ia dalim për edukimin në fushën e shkencave ushtarake.’- deklaroi ministri Peleshi.
/b.h
