“Kemi bërë 53 spitale”, Rama: Që nga vitet ’50 nuk ishte bërë asnjë investim për Shëndetësinë

Kryeministri Edi Rama i është përgjigjur kritikëve të tij në lidhje me shëndetësinë në rubrikën e tij “Sy m’Sy” në rrjetet sociale, ku tha se gjatë qeverisjes së tij janë ndërtuar 53 spitale, 10 prej tyre janë bërë nga e para.

“Unë besoj që kur vjen puna të shëndetësia, vetëm kush nuk i do nuk i sheh ndryshimet. Kemi ndërtuar 53 spitale. Spitali i Korçës që është një investim tani dhe mbaron në 2027, e di kur është ndërtuar Spitali i Korçës? Në 1927 dhe që nga ajo kohë nuk është bërë asnjë investim. Ku janë bërë investimet e fundit për të ndërtuar spitalet? Në vitet ’70 ’60 ’50. 53 spitale kemi bërë, 10 i kemi bërë komplet nga e para që nuk ezkistonin, 43 janë hedhur në tokë dhe janë ribërë nga fillimi.

Kur ne kemi marrë detyrën, shëndetësia kishte vetëm 250 milonë euro në total, sot ka 760 milionë Euro dhe po të llogarisësh programin e mbështetjes sociale shkojnë në 1 miliardë Euro. Sot janë 600 mijë qytetarë në pamundësi dhe e marrin shërbimin social falas edje pse nuk kanë paguar ndër vite kontributet. 400 ambulanca dhe qendra shëndetësore që ishin karakatina ku kujt i binte rruga gjente aty po të kishte fat një infemierë duke pirë cigare me skelete krevatesh hekuri me një batanije të vjetër ushtarake si letër zmerili edhe bën dhe ironi që shëndetësia falas si pasaporta e BE-së”, tha Rama.

E ndërsa sa i përket rimbursimit të barnave, kryeministri Rama tha se 210 mijë pensionistë janë rimbursuar plotësisht.

“Çmimi i barnave krahasur me vitin 2013 kur është rritur çdo çmim, ne i ulëm 30%, hoqëm TVSH dhe dyfishuam fondet e barnave të rimbursueshëm. Janë 210 mijë pensionistë që kanë marr barnat dhe janë rimbursuar”, tha Rama.