“Do t’ju drejtohem në shqip sipas rregullit dhe shpresoj që këtë herë përkthyesi të mos jetë si herën e kaluar kur përkthyesi ma shkatërroi komplet mesazhin”.
Kështu e nisi fjalën e tij kryeministri Edi Rama në samitin e Shkupit me titull ‘Ballkani i Hapur’.
Shëfi i ekzekutivit shqiptar shtoi se ky takim sot përbën një mozaik me pjesëmarrës nga sipërmarrës nga të gjithë vendet e Ballkanit Perëndimor, dhe kjo sipas Ramës, i jep një rëndëis të veçantë.
“Kjo nismë është jo vetëm gjëja e duhur, por edhe e vonuar. Ky rajon nuk mund të mbetet peng i të shkuarës në asnjë aspekt. Ne nuk duam të jetojmë me të shkuarën, por të projektojmë të ardhmen përmes një nisem që nuk shpik asgjë të re, por sjell në këtë rajon një shembull kuptimplotë që është shembulli i BE. Ne synojmë lehtësimin e katër lirive themelore. Për çfarë arsye në botë duhet të presim të mbyllur brenda kufijve tanë me kurriz nga njëri tjetri siç kemi ndenjur 500 vjet?
Në kohën kur të bëhemi pjesë e Bashkimit Evropian do të bëjmë pikërisht këtë që po bëjmë pa Bashkimin Evropian. Është sa për të ardhur keq, aq edhe për të qeshur kur pyesin me çudi se çfarë po bëjmë. Ne nuk mundemi dot të lexojmë shifra dhe fakte nga ekspertët e huaj ku thuhet se nëse duam të rrisim prodhimin e përgjithshëm kombëtar, ne mund ta rrisim atë deri në 2.5% vetëm nga integrimi ekonomik ndërkohë që nëse ne arrijmë nivelin e marrëveshjes europiane të tregtisë së lirë prodhimi mund të shkojë 6.7% në rritje.
E pse duhet ne t’ia privojmë vetes këtë mundësi duke ndenjur secili brenda hapësirës së tij të vogël? Ne nuk po bëjmë një karikaturë të Bashkimit Evropian sepse s’e kemi lluksin. Nuk do vendosim veton për njëri tjetrin” – tha Edi Rama ndër të tjera në Shkup.
/JavaNews/a.r
