Nga Emili Bibolli
Kam dëgjuar here pas here se dy partitë e mëdha aktuale politike në Shqipëri, një ditë do të pushojnë së qëni të tilla, kjo për shkak të konflikteve të brendshme, përplasjes së interesave dhe të filozofive përkatëse të vjetëruara (gjithmonë nëse kanë patur të tilla).
Sot jemi dëshmitarë të ilustrimit të parë të kësaj teze: Partia Demokratike është ndarë në dy fraksione të cilat njëkohësisht pretendojnë ekskluzivitetin mbi të.
I pari ai që drejton z.Basha, i cili vazhdoi atë që nisi z.Berisha, duke e shkatërruar partinë ndër vite, i ndjekur nga skandalet, dështimet e njëpasnjëshme, humbjet, gafat, bashkëpunëtorët e përfolur, dhe figurat qesharake. Nuk pati asnjë qarkullim elitash, asnjë program, asnjë aksion politik të finalizuar me sukses, por vetëm “udhëheqje” të të njëjtit stil që e gjeti të rrënjosur brenda partisë.
I dyti ai që drejton z.Berisha, dikur origjinali dhe sot bashkëautori i këtij shkatërrimi, i cili pas shpalljes non grata, në përpjekje për të siguruar mbrojtje i hoqi PD dhe tullën e fundit.
Përfundimi? Ky që po shohim sot.
Duke parë ç’po ndodh në PD, më duket se jemi gjithmonë e më afër asaj ditës kur të dyja partitë e mëdha politike në Shqipëri, kush më herët e kush më vonë, po i afrohen finales së tyre. Nuk mund të mohohet fakti se brenda të dyja forcave politike ka njerëz të pastër, të aftë, vizionarë, me merita dhe integritet, por modelet e zbatuara të drejtimit brenda këtyre partive, kanë promovuar vazhdimisht dhe kryesisht individët e përfolur për korrupsion, paligjshmëri, ose që janë afër kryetarit etj.
Unë nuk di të them nëse jeta politike e këtij vendi do vazhdojë të vërtitet rreth këtyre dy forcave, apo këto do të zvendësohen me forca të reja politike. Shpresoj vetëm që pavarësisht emrit dhe logos, në politikën shqiptare të zbatohen parimet e të mirës e të drejtës, e të prevalojë interesi kombëtar, dashuria për atdheun e për njerëzit, dhe jo fiksimi për xhepin.
