Institucioni i fundit i sistemit të drejtësisë së reformuar, që u krijua pas ndryshimeve kushtetuese të korrikut 2016 Inspektori i Lartë i Drejtësisë, pritet të ngrihet javën e ardhshme.
Pasi është çelur 3 herë gara për ketë post, tashmë është plotesuar numri minimal prej 5 kandidatësh që synojnë të jenë Inspektor i Lartë i drejtësisë dhe nesër Këshilli i Emërimeve në Drejtësi do të hartojë e miratojë renditjen përfundimtare me pikët për secilin prej garuesve.
Kjo listë do t’i çohet më pas Parlamentit e pritet që të mërkurën në 18 dhjetor që është seanca e fundit për këtë vit, deputetët të zgjedhin Inspektorin e Lartë të Drejtësisë.
Ashtu si për anëtarët e Gjykatës Kushtetuese dhe Prokurorin e Përgjithshëm nëse Parlamenti nuk arrin të sigurojë 84 vota brenda 30 ditëve, kandidati i renditur i pari bëhet automatikisht Inspektor i Lartë i Drejtësisë; por mazhoranca nuk ka asnjë problem votash kështu që në 18 dhjetor merr fund procesi i ngritjes së institucioneve të reja të drejtësisë.
Inspektori i Lartë i Drejtësisë ka si detyrë verifikimin e ankesave, hetimin e shkeljeve disiplinore dhe fillimin e procedurës disiplinore ndaj gjyqtarëve dhe prokurorëve të të gjitha niveleve, anëtarëve të Këshillit të Lartë Gjyqësor, anëtarëve të Këshillit të Lartë të Prokurorisë dhe të Prokurorit të Përgjithshëm, si dhe për inspektimin institucional të gjykatave dhe të zyrave të prokurorisë. /e.s/
