Pamja tjetër e Tiranës, është realiteti i hidhur i kryeqytetit shqiptar. Në qendër apo periferi, në çdo orë të ditës ndeshesh me njerëz te moshave të ndryshme që kërkojnë të mbijetojnë mes mbeturinave. Dikush kërkon shishe plastike, të tjerë kanaçe apo qelq. Të gjithë janë të rrezikuar nga një sërë sëmundjesh deri ato vdekjeprurëse. Specialiste pranë shëndetit publik tregojnë se këta individë të vetëpunësuar pranë kazave të mbeturinave, rrezikojnë seriozisht jetën.
“Sëmundjet nga literatura, janë mjaft të ndryshme duke filluar që nga gastrointeritet, tifot, dizanteri, sëmundje të lëkurës, parazitë intenstinal. Pse jo, në mbeturina janë identifikuar edhe mjaft mikrobe shumë të rrezikshme të tuberkulozit, difterisë”, shpjegon Arben Luzati, shef i departamentit të mjedisit ISHPS.
Këta persona duket se kanë marrë çdo risk mbi vete. Por a rrezikohen qytetarët e tjerë që i hedhin mbeturinat rregullisht në kazanë dhe pak orë më vonë i gjejnë të hapura në rrugë? Veçanërisht tani në verë, banorët e Tiranës janë të ekspozuar nga gazet e dëmshme që çlirojë mbeturinat, nga infeksionet e ndryshme dhe sëmundjet e lëkurës.
“Procesi i grumbullimit, transportimit të mbeturinave duhet të bëhet në mënyrë hermetike, pra kazanët duhet të jenë të mbyllura edhe ato mjetet që i transportojnë duhet të jenë mbyllura në mënyrë hermetike që punonjësi që i manipulojnë këto mbeturina të kenë kontakt sa më të vogël me to. Një administrim eficent, i qartë dhe me karakter shkencor i menaxhimit të mbeturinave e bën më të vogël riskun e popullatës ndaj këtyre sëmundjeve”, thotë Luzati.
I njohur me këtë realitet, kryetari i Bashkisë Erjon Veliaj, u ofroi punë këtyre personave pranë impianteve të përpunimit te mbeturinave.
“Qyteti i Tiranës nuk do të lejojë më ndërhyrjen në kazanët e plehrave. Bashkia e Tiranës bashkë me kolegë si PNUD-i është shumë e gatshme sot t’u ofrojë një punë me pagesë dhe me sigurime shoqërore, në pastrimin e qytetit ose në impiantin e Sharrës kujtdo që do të ketë një jetë me punë të ndershme në çështje të riciklimit”, u shpreh pak ditë më parë Veliaj.
Në muajin gusht do të nisë reforma në administrimin dhe menaxhimin e mbeturinave. Krahas një flote të re pastrimi, kazanët e mbeturinave do të jenë të rinj dhe të mbuluar me kapak. Ndërsa qendra e kryeqytetit do të pastrohet nga ndërmarrja e Bashkisë, e cila do te shërbeje si model per kompanitë private qe kane marre përsipër pastrimin e pjese tjetër te Tiranës. Me nisjen e kësaj reforme mbetet per t’u parë nëse këta persona do të vazhdojnë serish punën pranë kazanëve apo situata vërtet do të ndryshojë.
(java / r.a)
