Nga Artur Ajazi
Lulzim Basha e nisi turin e “riorganizimit” të PD ditët e fundit të 2017 pikërisht nga Kavaja, pikërisht nga simbolika e dikurshme e kësaj force politike, për ti ftuar demokratët atje, ti bashkohen “fushatës” së protestave të janarit 2018. Duket si paradoksale tek shikon kreun e PD, të ketë kurajon të nisë “fushatën e protestave” pikërisht nga Kavaja, për të cilën partia e tij sa ishte në pushtet nuk u kujtua pothuajse fare. Të duket paradoksale tek dëgjon se si kreu i PD, ka kurajon dhe fton demokratët e Kavajës të bashkohen në “fushatën e protestave popullore” kur e di fare mirë se atje dega e kësaj partie (si në çdo qytet) ndodhet në kaos total, dhe se shumica e bazës atje më shumë se kudo, mbetet e zhgënjyer maksimalisht.
Zoti Basha duke bërë demagogji në Kavajë theksoi se “mazhoranca doli nga blerja e votës dhe përfshirja e shtetit dhe e bandave në zgjedhje”, kur këto zgjedhje i ka njohur vetë ai i pari, dhe faktori ndërkombëtar. Zoti Basha tha se “është koha për të marrë përgjegjësi”, duke mos sfecifikuar se për çfarë përgjegjësish flet ai kur shumica e demokratëve në PD prej 8 muajsh kërkojnë nga ai, pikërisht të njëjtën gjë. Zoti Basha u tha kavajasve se “bashkimi i të gjithë demokratëve do të sjellë fitoren”, ndërkohë që PD më shumë se kurrë sot ndodhet në krizën më të madhe dhe më e pabashkuar se asnjëherë tjetër në këto 27 vjet , pikërisht nga dobësitë dhe drejtimi i gabuar i tij.
Zoti Basha u tha kavajasve se “ne jemi forca e vetme që qëndroi, që tregoi moral, që tregoi vendosmëri që nuk bleu asnjë votë, që nuk ofroi para dhe favore për votën, që nuk përdori krimin dhe bandat”, kur edhe kavajasit e dinë se si u zhvillua jo vetëm fushata e fundit elektorale por edhe procesi votimit të kryetarit të ri të PD në 22 korrik 2017. Ai u pohoi kavajasve se “është koha për të marrë përgjegjësi duke nisur nga unë, ndaj është ora për të marrë përgjegjësitë e mia”, ndërkohë që ka ndodhur e kundërta prej 8 muajsh, fjalë vetëm fjalë.
Zoti Basha e konsideron “fushatën e protestave” jo fundin e betejës opozitare ndërsa nuk u shpjegoi atyre se përse nuk ka deri tani, një program dhe një platformë të qartë të PD për aksionin opozitar 4 vjeçar, se përse ai u përqafua me Monikën, përse ai nuk ka sqaruar paqartësitë dhe zhgënjimin e mijëra demokratëve nga humbja e thellë në 25 qershor dhe votimin e 22 korrikut 2017, se përse sulmohen ashpër ambasadorët e SHBA dhe BE, se përse mban pranë këshilltarë të papjekur etj, etj.
Kjo pasi në fakt Kavaja, është leksioni që duhet të shërbejë si “mësim i mirë” për Lulzim Bashën , pasi është qyteti simbol (madje në qendër ka patur deri vonë edhe dy gishtat lart si vepër arti) që deri në 2013 nuk përjetoi asnjë realitet ndryshe pavarsisht premtimeve , dhe se çdo fushatë elektorale votat e tyre u përdorën vetëm politikisht. Zoti Basha u kërkoi demokratëve kavajas, “të bashkohen dhe të lenë mënjanë qejfmbetjet”, duke harruar se lart në piramidën drejtuese, Partia Demokratike ka 1001 probleme të pazgjidhura pikërisht nga mungesa e dëshirës së bashkimit dhe harresa e
qejfmbetjeve të kryetarit, që akoma këshillohet keq nga disa axhami që pasi morën nga lista e tij mandatin e deputetit, janë kthyer në manikina memece të grupit parlamentar. Zoti Basha duhet ta dijë se, aleanca me Monikën nuk mund ta transformojë, ribashkojë dhe ta kthejë Partinë Demokratike në një opozitë të besueshme, përkundrazi pas asaj që ndodhi në parlament me “çizmet fluturuese” dhe fjalorin e pasur, zhgënjimi është thelluar 100 fish.
Zoti Basha e di mirë se sjellja e opozitës ditën e votimit të Kryeprokurores së re, ishte e pakuptimtë dhe absurde, pasi mungonte çdo element i politikës qytetare. Duke demonstruar mungesën e theksuar të sjelljeve e principeve qytetare, opozita e zotit Basha ra në kurthin e Monikës, e cila përmes dhunës kaosit dhe imponimit fizik, mendoj se e realizoi skenarin e saj. Duke parë lëvizjet e fundit të kreut demokrat, bindesh se edhe për 2018 misioni i PD si opozitë mbetet i njëjtë me atë të 2017, protesta kuturru, aleanca ditore, duke shënuar si arritje të re ndoshta afrimin e ndonjë tjetër këshilltari rastësor, që zoti Basha do ta prezantojë sërish si “prurje të re”.
