Nga Artur Ajazi
Plot 4 orë debat ka patur paraditen e të martës në Komisionin e Çështjeve Ligjore, lidhur me rritjen e pagave të gjyqtarëve të Gjykatës Kushtetuese. Debatet ishin të natyrave të ndryshme, dhe krahasimi bëhej me “pagën e atyre të Gjykatës së Shkallës së Parë dhe të Lartë”. Dukej se gjatë gjithë diskutimeve, deputët e dy krahëve politike, nuk po binin në konsensus për rritjen e pagës super të lartë, e cila varion nga 376.380 mijë sot, në 644.640 që pritet të shkojë, në rast se miratohet në parim.
Plot 4 orë diskutime për rritje rrogash për gjyqtarët e superpaguar, në një vend ku ka njerëz që kanë punuar 30 apo 33 vjet, dhe sot marrin një pension 14.400 lekë të muaj. Njoh shumë të tillë, madje disa i kam edhe miq apo të njohur. Ata janë sot, në gjendje të mjerueshme. Njëri prej tyre ka mbi 33 vjet që punon, kryefamiliar, dhe vetëm 1 muaj më parë doli në pension me 14.400 lekë në muaj, me një djalë sakat, dhe dy të tjerë në shkollë akoma pa dalë në jetë. Tek dëgjoja debatet mes deputetëve “jo paga 376.380 mijë në muaj , apo 644.640 mijë në muaj” dhe bënin ndonjëherë edhe ndonjë shenjë “pendese” medemek “rritje duhet të kenë edhe pensionet e popullit”, më dukej tallje dhe hipokrizi.
Gjyqtarët dhe prokurorët, (pjesa më e madhe e tyre) në 32 vite tranzicion në Shqipëri, mbeten njerëzit më të përfolur, më të paguar, më të pasur, dhe më të akuzuarit nga shqiptarët. Drejtësia e re, nuk ka arritur 100 per qind të flakë nga rradhët e saj ende, vegjetuesit e korruptuar, dhe për pasojë rritja e rrogave në stratosferë, bie ndesh me realitetin dhe opinioni aktual ndaj tyre në Shqipëri.
Diferenca e jashtëzakonshme mes pagave dhe pensioneve e trasheguar tek ne, mbetet tregues i asaj, ç’ka duhet ndryshuar me urgjencë nga qeveria. Megjithë reformat e marra nga qeveria Rama, rritjen e vazhdueshme të pagave minimale dhe pensioneve të vogla, akoma ka diferenca dhe kontraste të thella mes tyre dhe kategorive shoqerore.
Pavarsisht se rritja e pagave për një hetues, prokuror apo gjyqtar, kalon përmes kritereve që lidhen me shkollimin, aftësimin, moralin, rrezikun e jetës për shkak të detyres, dhe CV e tij si profesionist, rritja 200 per qind e pagave mujore të tyre, natyrisht nuk mbetet pa u komentuar nga ata që nuk ngopin barkun me bukë. Reagimi është ndjerë qysh në momentin kur Parlamenti (dyfishoi) rriti rrogat e deputetëve, dhe nuk mbetet pa kontestuar edhe rritja e pagave të gjyqtarëve dhe prokurorëve.
Që një prokuror apo gjyqtar duhet paguar mirë, kjo nuk është logjike dhe duhet të ndodhë. Por kjo duhet të ndodhë edhe me pensionet 8.500 apo 14.400 lekëshe, me të cilat sot mund të shtysh vetëm 10 ditë në muaj, pa llogaritur problemet shëndetsore të një pensionisti.
Ndaj debatet në Komisionin e Çështjeve Ligjore, lidhur me rritjen e madhe të pagave mujore për gjyqtarët e Kushtetueses, dukeshin si luks i panevojshëm, kur mendon se aq shumë para, një pensionist nuk i merr deri ditën e fundit të jetës tij.
