Sulmi me armë zjarri në periferinë e Dallasit ishte jehonë e sulmeve dhe kërcënimeve të kaluara në shtete të tjera të perëndimit kundër portretizimit të profetit Muhamed.
Në janar, persona të armatosur vranë 12 persona në Paris, në zyrat e revistës satirike “Charlie Hebdo”, si hakmarrje për karikaturat e revistës me profetin Muhamed.
Sulmi i së dielës ka ndodhur pak para orës 7 të mbrëmjes, sipas llogaritjes së orës në Teksas, në një vend parkimi në qendrën “Curtis Culwell”, një arenë e mbyllur në periferi të Garlandit, verilindje të Dallasit.
Politikani kontravers holandez dhe aktivisti kundër islamik, Geert Wilders, i cili gjithashtu është pjesë e një liste të Al Kaidës për t’u vrarë, ka qenë në mesin e atyre që do të mbante fjalim në këtë ngjarje.
Policia ka thënë se nuk kanë identifikuar menjëherë dy personat e armatosur apo nëse ata janë të lidhur me kritikët e ngjarjes, të cilët e kanë quajtur atë si kundër-islamit.
Si masë paraprake, një ekip për çarmatosjen e bombave është thirrur në vendin e ngjarjes për të kontrolluar veturën e sulmuesve në rast se brenda ka mjete shpërthyese.
Zona afër objektit ku mbahej aktiviteti është evakuuar, ka thënë për agjencinë Reuters, zëdhënësi i policisë së qytetit, Joe Harn.
Ekspozita është organizuar nga Pamela Geller, presidente e Iniciativës Amerikane për Mbrojtje të Lirisë (AFDI).
Organizata e saj e cila përshkruhet si grup që nxit urrejtje, deri më tash ka sponsoruar fushata rekalamash që janë konsideruar kundër islamike.
Organizatorët e “Garës dhe Ekspozitës së Muhamedit” kanë thënë se kjo ngjarje promovon lirinë e shprehjes.
Ata kanë ofruar 10 mijë euro për punimin më të mirë artistik apo karikaturën që e portretizon profetin, si dhe 2500 dollarë për atë që e pëlqen publiku më së shumti.
Portretizimet e profetit Muhamed, sipas myslimanëve janë ofenduese, dhe për këtë arti perëndimor që e ka bërë këtë, rregullisht ka zemëruar myslimanët, ndërsa ka provokuar kërcënime nga radikalët, shkruan më tej Reuters.
Në incidentin e së dielës, të dy të dyshuarit kanë udhëtuar deri te ndërtesa ku ekspozita ishte afër fundit të saj dhe kanë filluar të gjuajnë me armë automatike në drejtim të një oficeri të paarmatosur të sigurisë duke e plagosur në këmbë, thonë zyrtarë të policisë.
Policia e Garlandit ka gjuajtur në drejtim të sulmuesve dhe i ka vrarë ata, ka thënë Harn.
Oficeri i plagosur është trajtuar në spital dhe më pas është liruar, ka thënë më tej zëdhënësi i policisë së këtij qyteti.
“I dyshuari i parë është qëlluar menjëherë. I dyshuari i dytë është qëlluar dhe lënduar. Ai ka arritur te çanta e tij. Natyrisht, oficerët, duke mos e ditur se çfarë kishte në çantë, e kanë qëlluar sërish. Me këtë ai është vrarë”, i ka thënë televizionit amerikan, CNN, kryebashkiaku i Garlandit, Douglas Athas.
Athas thotë se ka qenë i shqetësuar për rrezikun që përmban një aktivitet i tillë, porse gara dhe ekspozita është lejuar pasi kështu mbrohet kushtetuta amerikane.
REL
