Kardinali Ernest Troshani ka folur për herë të parë nga salla e parlamentit, pak javë pasi Papa Francesku e bëri atë kardinal të Kishës Katolike. Ernest Troshani ka dhënë një mesazh të fortë përpara deputetëve, duke u thënë fillimisht se ai nuk ka ardhur që t’u mësojë gjë atyre, por më pas ka shtuar se ata, nuk duhet të harrojnë nevojat e popullit dhe duhet t’i shërbejnë vendit të tyre.
“Të nderuar deputetë, ministra, i nderuar zoti kryeministër, është një nder i veçantë për mu dhe me fol prej kësaj foltoreje. Ashtu sic është një nder i pashoqë që të përfaqësoj Kishën Katolike.
Nuk kam ardh me ju mësu asgjë të re, por të falënderoj atdheun se pas një rrebeshi prej dekadash gjeti forcën të njohë vlerat e bijve dhe bijave të tij. Jam i fundmi dëshmitar i atyre që kanë vuajtur dhe persekutuar. Papa nuk më nderoi vetëm mua, por gjithë shqiptarët, kemi punuar për ngritjen morale të shqiptarëve, edhe kur nuk kishim mjetet e tjera kemi gjetur forcë e ngushëllim. Populli ka nda kafshatën e gojës me ne na ka ndihmuar sa ka mundur.
Kujtoni se jeni me një mision të lartë, mos harroni e nevojat e popullit, të barabartë para ligjit për t’i shërbyer zotit dhe popullit… Kam porosi atnore, krishti ka shkru pavdekësimin e shpirtit, për atë punoni, cfarë fiton nëse humbet shpirtin. Lutemi për paqen, vllazni e dashni, përpiquni që së bashku cdo njëri të shohë begati, drejtësi, e bekim, të jeni më afër problemeve të popullit, politika të jetë shërbim e jo përfitim, atëherë ju do të keni respektin e njerëzve të thjeshtë që kanë besuar te ju”- tha Troshani./java/a.k
