Ish-ambasadori i Shqipërisë në Vatikan, Zef Bushati, ka folur për figurën e Papa Françeskut, i cili u nda nga jeta javën e kaluar dhe sot u përcoll sot në banesën e fundit. Në një intervistë në emisionin “Kjo Javë” në News24, Bushati theksoi ndikimin e thellë që Papa Françesku pati në Kishën Katolike dhe në botën mbarë.
“Çdo Papë ka një mision, nuk vjen vetëm për një detyrë,” tha Bushati, duke nënvizuar se Papa Françesku spikati për modesti dhe ndjeshmëri ndaj të varfërve dhe emigrantëve. Ai theksoi se Papa, megjithëse i lindur jashtë Italisë, ndjeu gjithmonë peshën e trajtimit të padrejtë ndaj emigrantëve dhe mori anën e tyre, duke e kthyer këtë në një shtyllë të misionit të tij.
Bushati kujtoi se Papa Françesku vinte nga një mjedis i varfër dhe e njihte vuajtjen që në ditët kur shërbente si prift i thjeshtë. Kjo e bëri atë të punonte për të sjellë një frymë të re në Kishë, duke i dhënë më shumë vlerë përkushtimit shpirtëror sesa pasurisë materiale.
“Ai u thoshte ipeshkëve dhe kardinalëve që përdornin kryqe floriri se duhet të vlerësohej kryqi dhe jo metali i tij,” tregoi Bushati, duke përmendur mesazhin e përhershëm të thjeshtësisë që Papa Françesku përcolli gjatë gjithë papatit të tij.
Ish-ambasadori ka vlerësuar kontributin e Papa Françeskut për paqen dhe drejtësinë sociale, teksa foli për trashëgiminë e tij pas ndarjes nga jeta javën e kaluar.
Bushati kujtoi një prej deklaratave më të forta të Papës, sipas të cilit “nëse do të ndalonte shitblerja e armëve, bota për një vit nuk do të ndjente më varfërinë siç e ndjen sot”, një mesazh i fuqishëm që sfidoi drejtpërdrejt industrinë globale të armëve.
Ai tha se Papa Françesku kishte një angazhim të jashtëzakonshëm për paqen, duke kërkuar edhe një takim me presidentin rus Vladimir Putin në përpjekje për të ndalur luftën në Ukrainë. Edhe pse përpjekjet e tij për vendosjen e paqes ishin të vështira, Bushati theksoi se Papa nuk reshti së luftuari me mjetet e diplomacisë dhe dialogut.
“Papa Françesku bëri luftën e tij për paqen,” tha Bushati, duke nënvizuar se përmes veprimeve të tij, Ati i Shenjtë mbeti një zë i fuqishëm kundër dhunës dhe padrejtësive globale.
“Ai dërgoi sekretarin e Shtetit të Vatikanit, Parolin, të bisedonte me Putinin, por vendosja e paqes në luftën në Ukrainë ishte e vështirë, por ai bëri luftën e tij për paqen”, tha ai.
