Policia e Tiranës arreston sot në një lokal në Sauk biznesmenin e njohur të kafesë Julian Bregun dhe mikun e tij Fatjon Brahja.
Ata u arrestuan, pasi policia gjeti në makinën e tyre 1 kg kanabis, ndonëse ka dyshime se lënda narkotike mund të jetë pjesë e një kurthi të ngritur ndaj biznesmenit, pasi ky i fundit denoncoi pak kohë më parë për gjobëvënie, Pajtim Serjanin, mikun e Emiliano Shullazit.
Burime të News 24 pranë policisë së Tiranës bëjnë me dije se policia kontrolloi mjetin e biznesmenit, pas një telefonate në numrin 112, ku sinjalizoheshin për drogë në makinën e tij.
Ndërsa të dy shokët konsumonin një kafe në Sauk, blutë e Tiranës pikasën mjetin dhe nisën kontrollin. Brenda tij, u gjet një qese e lidhur me tel në parafrangon e makinës, brenda së cilës kishte rreth 1 kg kanabis.
Dyshimet e forta të policisë për kurth lidhen me faktin se Julian Bregu më herët ka kallëzuar shtetasin Pajtim Seriani, që tashmë ndodhet në burg. Policia është duke punuar për sqarimin e rrethanave të ngjarjes dhe ka sekuestruar kamerat e bizneseve në bazë të lëvizjes që ka bërë mjeti i biznesmenit.
GJOBEVENIA
Biznesmeni i kafes kallëzoi mikun e Shullazit, Pajtim Serianin se e kishte kërcënuar me jetë nëse nuk i dorëzonte 13 mijë euro. Policia nuk e bëri të ditur emrin e biznesmenit pas kërkesës së tij për të mbetur anonim. Denoncimi i tij është provuar gjatë hetimeve që ka kryer Prokuroria e Krimeve të Rënda dhe Policia e Kryeqytetit. Ashtu siç është provuar edhe një lloj “kontrate” që të arrestuarit e detyronin biznesmenin të nënshkruante me ta, edhe pse pa laps e letër, që e detyronte atë të paguante tek autorët 10 për qind të xhiros vjetore, në këmbim të jetës së tij e të familjarëve.
Pajtim Serjani njihet në kryeqytet si një nga njerëzit më të afërt të Emiljano Shullazit, ndërsa rreth 4 muaj më parë ai u plagos gjatë një atentati ndaj tij, ku u vra personi që e qëlloi, Artur Baze./a.m.
