Pesë përkrahës kosovarë të ISIS-it nuk kanë arritur t’i betohen liderit të kësaj organizate terroriste, Ebu Bekr Al – Baghdadi, për besnikëri e devotshmëri deri në flijim.
Janë kapur pak para se të jepnin betimin buzë liqenit të Badovcit. Atyre, pos provave të tjera, u është zënë edhe teksti i betimit i përkthyer në gjuhën shqipe. “Koha Ditore” ka një kopje të këtij teksti. Teksti i betimit i është zënë Besnik Latifit, (1977) nga Mitrovica, Gazmend Halitit, (1984) nga Novobërda, Milazim Haxhiajt, 1987 nga Rakoshi i Istogut, Betim Ibrahimajt, (1987) nga Zhakova e Istogut, Enes Latifit (1982) nga Zasella e Mitrovicës dhe Fehmi Musangës (1984) nga Prishtina, të akuzuar ditë më parë nga prokurorja speciale, Drita Hajdari, për vepra penale të terrorizmit.
