3.4 tonë kokainë janë sekuestruar në një operacion antidrogë të policisë në Peru, që si destinacion final kishte Belgjikën.
Lënda narkotike e kapur gjatë së shtunës ishte fshehur në një ngarkesë me banana dhe ishte e ndarë në 3 mijë pako.
Operacioni i kryer u udhëhoq nga DEA amerikane, ndërsa rajoni ku u zhvillua njihet në Peru si më i madhi i kultivimit të kokainës.
Për këtë ngarkesë të kapur, në pranga përfundoi një person i cili u ndalua në qytetin e Piruas, në Peru.
Në një deklaratë zyrtare, përfaqësues të policisë peruane thanë se droga ishte 98% e pastër, ndërsa në treg vlera e saj përllogaritet rreth 68 milionë dollarë.
Nga hetimet e deritanishme, kokaina që destinacion kishte Belgjikën ka pas saj një organizatë kriminale, anëtarët e së cilës janë nga vende të ndryshme të botës, ndërsa tregtimin e saj në Europë, po sipas policisë vendase, dyshohet se e bënin kartele meksikane ose shqiptare.
Lidhja e shqiptarëve me grupet kriminale të trafikut të drogës në Peru është ekspozuar edhe më parë falë operacioneve të zhvilluara nga autoritetet ndërkombëtare, por jo vetëm.
