Kandidatët republikanë presidencialë amerikanë po përgatiten ethshëm për debatin e tyre të fundit televiziv përpara raundit të parë të votimeve primare.
”Nëntë nga 13 kandidatët që po kërkojnë nominimin republikan do të jenë në debatin e Las Vegasit”, njoftoi CNN-i.
Manjati i pasurive të patundshme, Donald Trump do të jetë në qendër të skenës për shkak të statusit që gëzon si kryesues i sondazheve.
Ai do të ketë në krah kandidatët Ben Carson dhe senatorin e Teksasit, Ted Cruz, i cili ndjek Trumpin në sondazhe.
Gjashtë pjesëmarrësit e tjerë janë senatori i Floridas, Marco Rubio, ish-guvernatori i Floridas, Jeb Bush, gruaja e biznesit, Carly Fiorina, guvernatori i Nju Xherseit, Chris Christie, guvernatori i Ohajos, John Kasich dhe senatori i Kentakit, Rand Paul.
”Ata u zgjodhën në bazë të sondazheve”, shtoi CNN-i.
