Hetimi i drejtësisë italiane për grupin kriminal të Habilajve nuk është i pari. Në Prokurorinë e Krimeve të Rënda prej tre muajsh po punohet për një rast tjetër të grupit të Habiljave, ku tre prokurorët e çështjes kanë bashkëpunuar edhe me autoritetet e Leçes në Itali.
Ndërsa dosja e publikuar së fundmi nga organet e drejtësisë të Katanias tashmë cilësohet si “Dosja Habilaj 2” dhe pas takimit të Adriatik Llallës sot me prokurorët e krimeve të rënda, pritet që të merret dosja nga prokuroria e Katanias dhe të procedohet në Shqipëri.
Por ekziston një tjetër fakt më i rëndë, që mund të marrë përmasat e një skandali. Gazetarja Anila Hoxha tha në emisionin “Top Story” se prokuroria po heton mbi misionet e Guardia di Finanzas italiane në Shqipëri për parcelat e drogës. Sipas gazetares, megjithëse informacionet janë të klasifikuara si “top-secret”, prokuroria dyshon se policia ka keq-orientuar autoritetet italiane në Shqipëri.
“Prokuroria ka marrë dosje voluminoze nga GdF, bëhet fjalë për të gjitha misionet e italianëve në verën e vitit 2016. Po hetohet nëse policia e ka çuar në drejtim të gabuar Guardia di Finanzan, e cila kryente fluturime në Shqipëri. Dyshohet se në disa raste ky operacion është keq-orientuar”, ka treguar gazetarja Hoxha gjatë emisionit “Top Story”.
a.ç
