Sekuestrimi i një kamioni me 8 ton drogë në Ankona të Italisë solli arrestimin e 19 personave në Shqipëri, mes tyre punonjës policie dhe doganierë në portin e Durrësit dhe doganën e Qafë Thanës, nga ku hyri në Shqipëri mjeti me drejtues një shtetas maqedonas.
Sasia e madhe e drogës, fillimisht u raportua se ka hyrë nga Maqedonia përmes pikës së kalimit në Qafë Thanë, por duket se hetimet në këtë pikë kanë marrë kthesë. Nga verifikimi i bërë, rezulton se kamioni ka hyrë bosh nga Maqedonia në territorin e Shqipërisë. Kjo është konfirmuar edhe nga kompania e skanimit të doganave përmes fotografimit të kamionit, materiale të cilat janë vërtetuar nga prokuroria.
E gjithë sasia e drogës është ngarkuar në Shqipëri sipas burimeve dhe përmes portit të Durrësit ku janë shmkangur kontrollet me ndihmën e shefit të Postës së Policisë dhe doganierëve, ka kaluar në Itali. Tashmë po hetohet nga policia për të zbuluar vendin ku është garkuar me drogë kamioni. Sipas dyshimeve, ‘koka’ e trafikut është ende i lirë, e po ashtu edhe anëtarët e tjerë të rrjetit të trafikut. Në pranga ranë vetëm bashkëpunëtorët, në rastin konkret punonjësit e policisë dhe doganave. Policia ka dyshime se kamioni u ngarkua në zonën e Elbasanit, para se të nisej drejt Italisë./Java/a.m.
