Një seri shpërthimesh dhe më pas një përleshje e armatosur mes policisë dhe disa personave të armatosur në kryeqytetin indonezian, Xhakarta, kanë lënë të vdekur të paktën gjashtë persona.
Policia indoneziane raporton se mes viktimave janë tre policë dhe tre civilë. Ata ende nuk e dinë se kush qëndron mbrapa këtij sulmi, ndërsa asnjë grup ende nuk ka marrë përgjegjësinë për aktin.
Mediat lokale raportuan se kanë shpërthyer 6 bomba, ndërsa deri më tani policia konfirmon se një kamikaz ka hedhur veten në erë.
Sulmi ndodhi në qendër të Xhakartas, përpara qendrës tregtare “Sarinah”, në afërsi të pallatit presidencial dhe zyrave të Kombeve të Bashkuara.
Mediat lokale raportojnë se disa pajisje të dyshimta janë gjetur pranë Ambasadës turke dhe asaj pakistaneze. Dyshohen se janë bomba.
Policia ka këshilluar qytetarët që të mos dalin jashtë, deri në një njoftim të dytë.
Indonezia është në gatishmëri prej kohësh, për faktin se edhe në të kaluarën vendi ka qenë pre e sulmeve nga militantë islamikë.
