Dy ditë më parë, “Lexo.al” publikoi të dhëna se si punonjësve të Bashkisë së Lezhës u është dhënë urdhëri që në datën 16 shkurt të udhëtojnë në Tiranë, për të marrë pjesë në protestën e opozitës. Ata që nuk do të bashkohen me këtë protestë rrezikojnë shkarkimin e menjëhershëm nga vendi i punës. http://lexo.com.al/detajet-bashkia-lezhe-te-gjithe-punonjesit-me-detyrim-ne-protesten-e-16-shkurtit/
Megjithatë, përveç punonjësve, presioni është shtrirë edhe tek familjet e varfëra që trajtohen me ndihmë ekonomike nga bashkitë në të cilat janë në fuqi kryebashkiakë demokratë, siç është rasti i Kamzës. Për disa ditë me radhë, kryebashkiaku Xhelal Mziu, së bashku me zëvendësin e tij Anton Pjetërnikaj ka nisur një tur në Kamëz dhe Paskuqan, me një mesazh të qartë për të gjithë nevojtarët.
Në formë informale apo e thënë troç, atyre u është bërë e qartë që pjesëmarrja në protestën e 16 shkurtit është një detyrim, ndryshe do të ndërpritet ndihma e tyre ekonomike. Për shumë këto familje të varfëra, ndihma ekonomike është burimi i vetëm i jetesës dhe ndërprerja e saj do të linte të gjithë këto familje pa asnjë mundësi tjetër për t’u ushqyer. Kjo nuk është hera e parë që familjeve të varfëra u bëhet presion me kafshatën e bukës. Megjithatë, përdorimi i tyre për qëllime politike shënon një pikë tjetër të ulët në politikën shqiptare./ Lexo.al
