Producenti Turjan Hysko, i ftuar në studion e “Dita Jonë” në A2CNN, tregoi marrëdhënien e tij të veçantë me aktorin Albano Bogdo, për të cilin tha se e do më shumë se të tjerët.
“Kam kaluar shumë kohë me Julin (Dedën), por nuk kemi ndarë shumë, ndoshta edhe prej pozicioneve që kishim. Edi Oga është personi me të cilin flas për të gjitha projektet e mia. Është dëgjues shumë i mirë. Por, marrëdhënia më e bukur është me Albano Bogdon. Më shumë kam vuajtur me Albanon se me tim vëlla. Aktorët e tjerë më thonin që Albanon e do më shumë se ne. Besoj që kanë pasur të drejtë. Hyra në familjen e tij, ka pasur një jetë jo të thjeshtë dhe duke qenë se është shumë i talentuar, unë nuk doja që talentin e tij mos ta njihnin njerëzit”, u shpreh Hysko.
“E doja pak më shumë se të tjerët, ai ta lejonte ta trajtoje si vëlla të vogël. Ndoshta ndonjëherë jam treguar i padrejtë me të, i kam bërtitur më shumë seç duhet, por kjo ishte sepse me të qanim hallet. Ka edhe këtë, që në një moment zhduket. Për shembull, nuk më ka ardhur në dasmë. Kush e njeh, e di që kështu është Albano. Kurrë nuk ia kam marrë për keq asgjë, sepse e di që ai më do aq shumë sa e dua edhe unë”, shtoi producenti.
