Më datën 25.11.2016 në orët e mbrëmjes mjetet speciale të vëzhgimit të instaluara në kufirin e gjelbër nga ana e Policise Kufitare Kapshtice, në rajonin e piramidave 43-44 (fshati Ponçarë-Devoll) transmetuan sinjalin me foto ku tregohej një shtetas i paidentifikuar dhe 2 kafshë dore që dallohej se ishin të ngarkuara me thasë duke lëvizur në drejtim të shtetit grek.
Pas sinjalit të dhënë, u njoftua menjëherë Patrulla e Policisë Kufitare dhe u orjentua për të shkuar në drejtimin e dhënë.
Njëkohësisht Shefi i Sektorit të Kufirit Korçe ka komunikuar me telefon me homologun e Policisë Greke, duke i shpjeguar dhe orjentuar për situatën konkrete.
Nga ana e Patrullave të Policisë Kufitare të Kapshtices ka vijuar ndjekja e tyre, ndjekje e kryer në kushte te errësirës së plote dhe mjergullës së dendur.
Nga komunikimi i vazhdueshëm me homologët e policisë greke, Policia Kufitare Kapshticē u informua se rreth orës 04.30, në afërsi të fshatit grek Argos, rreth 12 km në brendësi të kufirit, forcat e policisë greke kanë kapur një shtetas grek me 4(katër) thasë me lëndë narkotike kanabis sativa me peshë 78 kg.
Nga tërësia e veprimeve rezulton se lënda narkotike e kapur ka lidhje të drejtpërdrejtë me informacionin e shkëmbyer mes Policisë Kufitare të Kapshticës dhe asaj Greke.
Për sa më lart, homologët e policisë greke shprehën falenderim për bashkëpunimin e mësipërm./a.m.
