Prokuroria e Përgjithshme ka reaguar lidhur me denoncimin publik të ish-nënkomisarit Emiliano Nuhu, i cili thotë se është kërcënuar në zyrën e tij teksa i merrte kallëzim Xhisiela Malokut, e cila denoncoi për dhunë ish-të dashurin Rexhep Rraja.
Organi i akuzës thotë se ka kryer veprime konkrete hetimore pas kallëzimit të Nuhut ku përfshihen administrimi i pamjeve filmike dhe pyetja e protagonistëve.
Reagimi i prokurorisë:
Prokuroria e Përgjithshme spjegon ecurinë e hetime lidhur me letrën e Emiljano Nuhut dërguar Drejtorit të Përgjithshëm të Policisë së Shtetit, ku spjegon se është kërcënuar.
Prokuroria e Përgjithshme sqaron se pranë saj, është dërguar për dijeni, letra e nënkomisarit të policisë Emiljano Nuhu.
Pavarësisht se shkresa e nënkomisarit Nuhu është e dërguar për dijeni, Prokuroria e Përgjithshme i ka dërguar materialin Prokurorisë së Rrethit Gjyqësor Tiranë, për të kryer verifikimet e nevojshme mbi pretendimet e kërkuesit Emiljano Nuhu, për kërcënimet dhe frikën për jetën.
Sipas parashikimeve të ligjit nr.10173, datë 22.10.2009 “Për Mbrojtjen e dëshmitarëve dhe bashkëpunëtorëve të drejtësisë” është kërkuar të vlerësohet situata e paraqitur nga kërkuesi Emiljano Nuhu.
Prokuroria e Rrethit Gjyqësor, Tiranë ka informuar se pranë kësaj prokurorie është regjistruar procedimi penal Nr.7103 për veprën penale “Kanosja për shkak të detyrës” parashikuar nga neni 237 i Kodit Penal.
Ky procedim është regjistruar mbi bazën e referimit të Komisariatit të Policisë nr. 6 mbi bazën e kallëzimit të shtetasit Emiljano Nuhu. Në kallëzim, sikurse në shkresën e dërguar për dijeni Prokurorisë së Përgjithshme, kallëzuesi pretendon se është kanosur për shkak të detyrës nga ana e shtetasve Rrahman Rraja dhe Rexhep Rraja.
Në kuadër të hetimit të këtij procedimi penal janë administruar të dhëna shkresore, janë këqyrur pamje filmike si dhe janë pyetur persona që kanë dijeni për ngjarjen.
Hetimi vijon me intensitet në drejtim të zbardhjes së rrethanave të ngjarjes, evidentimit të faktit penal dhe personave të dyshuar si të përfshirë.
