Majlinda Bregu ka qenë një prej kritikeve më të ashpra të Lulzim Bashës gjatë katër viteve në opozitë, duke filluar nga reforma në drejtësi, humbja në Dibër e deri te qëndrimi i saj kundër bojkotit të zgjedhjeve parlamentare.
Bregu shmang një përgjigje direkte kur pyetet nga gazetarja në lidhje me propozimin Topalli-Imami për shkarkimin e Bashës duke vënë theksin te fushata e cila duhet, sipas Bregut, të marrë përparësi për çdo demokrat e demokrate.
Në një intervistë për Vizion Plus, Majlinda Bregu ka thënë se tani është koha që të punojnë për fitoren e Partisë Demokratike, megjithëse shprehet e kënaqur nga “zgjimi” i deputetëve demokratë për të adresuar problemin aty ku ka qenë gjatë gjithë kësaj kohe.
Zonja Bregu, ju u takuat dje me Zonjën Topalli, por a e mbështesni ju idenë e saj për shkarkimin e Zotit Basha, para 25 qershorit?
Unë nuk është hera e parë që flas për forumet dhe as për statutin e Partisë Demokratike, i cili në fakt ka një të vërtetë dhe ky është fakt tashmë, të cilën e kemi diskutuar dje dhe në një kafe shumë miqësore me miq që statuti nuk është respektuar dhe është shkelur.
Megjithatë mua më intereson më shumë sot, dhe besoj të gjithë ne së bashku na intereson Partia Demokratike.
Na intereson që Partia Demokratike të vazhdojë të jetë e fortë, Partia Demokratike të maksimalizojë rezultatin e saj në zgjedhjet e qershorit dhe njëkohësisht ajo për të cilën besoj ka interes çdo demokrat i vërtetë është që Partia Demokratike si shtëpia e madhe e lirisë së shqiptarëve të vazhdojë të jetë po aq e fortë sa ka qenë dhe jo të ekzistojë si gjallesë fantazëm e republikës së re.
Kjo është më e rëndësishme për ne, dhe të siguroj që si unë edhe të gjithë kolegët që kemi takuar dje nuk kemi asnjë interes tjetër primar përveç interesit për të punuar me të gjitha mundësitë që do kemi në këtë fushatë pro Partisë Demokratike.
Analiza për kryetarin pas zgjedhjeve?
Është shumë mirë që ka një zgjim më të madh sot të të gjithë demokratëve për të kuptuar dhe për të adresuar problemin atje ku realisht ka qënë gjatë gjithë kësaj kohe. Unë vazhdoj të besoj që Partia Demokratike është e të gjithëve, nuk është parti as e kryetarit aktual dhe s’mund të jetë kurrë parti vetëm e Njëshit.
