Kadri Veseli turpëroi Tiranën

Nga Skënder Minxhozi/

Në fakt s’na ka turpëruar vetëm ai. Na ka turpëruar e gjithë klasa politike kosovare, e cila i tregoi pjesës tjetër të kombit, klasës politike të Tiranës, sesi votohet, sesi numërohen votat dhe mbi të gjitha, sesi humbet. Në këtë pikë humbësit, PDK e të tjerët, dhanë mësimin madhor të pranimit civil të rezultatit. Sepse të gjithë janë gati të thonë “Fituam”, puna është kush thotë “Humbëm”.

Që Kosova është një realitet politik e social hiç më i keq se Shqipëria, këtë e kemi ditur prej kohësh, por e tregoi edhe votimi i të dielës së fundit. Prej vitesh elita politike kosovare ka pasur një sjellje më të qetë, më etike, më bashkëpunuese mes vetes. Mjafton të shohësh fjalorin që kanë përdorur krerët politikë e përfaqësuesit shtetërorë mes tyre. Një ndryshim thelbësor mes dy anëve të kufirit, ku politika e Tiranës i ngjan më shumë një cirku gladiatorësh.

Në anën tjetër, Kosova është shoqëri e cila i hyri tranzicionit (më saktë formimit të shtetit të ri), një dekadë pas Shqipërisë, e që po del prej tunelit mesa duket para nesh. Sepse akti i madh dhe final emancipues, që e nxjerr një shtet nga këneta e tranzicionit, është më së pari vota. Një votë që për kosovarët erdhi e qetë, u përjetua pa asnjë incident dhe fituesit e humbësit u panë brenda natës.

Një shembull që këtu në Tiranë duhet ta thjesht ta ëndërrojnë, pasi këtu thuajse anjëherë nuk del një fitues dhe një humbës i qartë, muaj e vite pas ditës së votimit. Të gjithë kanë fituar, askush s’ka humbur. Vetëm “i kanë vjedhur fitoren”!

Kosova mbyll ciklin e qeverisjes prej partive të dala nga lufta e vitit 1999, për t’ja kthyer pushtetin forcave politike që kryesohen nga një lëvizje në thelb anti-sistem. Me veçoritë e saj të spikatura, Vetëvendosja është një eksperiment i kthyer gradualisht në një projekt politik fitues. Kurse me Albin Kurtin, Kosova merr përsipër të shkelë një rrugë të panjohur, por qytetarët e saj dhanë një mesazh të qartë: ndryshim dhe largim nga elita politike e vjetër. Merrni shembull nga mësimi që na dhanë.