Deputeti i Lëvizjes Socialiste për Integrim, Gjovalin Kadeli deklaroi sot nga Lezha se qyteti në fjalë dhe zonat përreth tij, janë diskriminuar nga qeveria për sa i përket investimeve.
Sipas deputetit, shumica e investimeve të qeverisë kanë shkuar në jug të vendit dhe kjo është e papranueshme:
“Investimet kanë shkuar të gjitha në jug dhe kjo është e papranueshme. Porti i Shëngjinit është diskriminuar. Sapo mësojmë se Ahmetaj në Prishtinë paska ndryshuar drejtimin e transportit të mallrave nga portet shqiptare drejt Kosovës.
Do të jetë Durrësi dhe jo Shëngjini porti që do të operojë për mallrat kosovare dhe ky ndryshim destinacioni bëhet për shkak të mungesës së infrastrukturës së dobët që ka Shëngjini! E vërtet është por kush e ka në dorë infrastrukturën?!
Dhe për këtë unë kam disa pyetje: Përse nuk u bë realitet hapja e një tuneli (800 ml) që lidh Shëngjinin me autostradën në Balldren, i premtuar nga kryeministri? Përse nuk vazhdon lidhja e autostradës nga Rrotondo – Shëngjin (3 km)? Përse nuk e ndërtuan nënstacionin elektrik të premtuar për Shëngjinin pasi përsëri do ketë probleme me energjinë gjatë sezonit veror?
Përse edhe Shëngjini të mos ketë investime te paktën sa gjysma e Vlorës? Duhet një përgjigje për banoret e Shëngjinit e të Lezhës , për pushuesit nga Kosova që janë të shumtë ato që frekuentojnë Shëngjinin”.
Tema/d.i.
