Ergys Kaçe do të braktisë Kombëtaren shqiptare, duke mos pranuar trajtimin që i bëhet nga trajneri Gianni De Biasi. Mesfushori i huazuar te Plzen nga PAOK pritet që në të ardhmen të refuzojë edhe ftesat që do të marrë nga trajneri italian.
Gazeta “Panorama Sport” ka mësuar edhe prapaskenat që kanë ndodhur në grumbullimin e fundit të kuqezinjve, që kanë shtyrë lojtarin të ndërmarrë një veprim që asnjë tifoz kuqezi nuk do ta mirëpriste.
Prapaskena
Në momentin që Kombëtarja kuqezi ka kryer seancën e fundit stërvitore në stadiumin “Loro Boriçi”, Gianni De Biasi i ka komunikuar Kaçes, në prani të pjesëtarit të stafit, Ervin Bulku, që ai nuk do të ishte në formacion dhe se do ta ndiqte ndeshjen në tribunë, duke mos u përfshirë në protokoll. Gazeta “Panorama Sport”, nga burime pranë Kombëtares ka mësuar se trajneri i ka komunikuar mesfushorit se arsyeja kishte të bënte me mungesën e formës së tij fizike.
Ai më tej i ka premtuar lojtarit se do ta llogariste si pjesë të formacionit bazë për ndeshjen e ardhshme kundër Izraelit. Kjo e ka bërë Kaçen të mendojë largimin nga grumbullimi, por një bisedë me presidentin e FSHF-së e ka bindur për të shmangur skandalin.
Vendimi
Burime pranë lojtarit kanë bërë me dije se Kaçe ka vendosur paraprakisht që të mos pranojë më që të vijë në Kombëtare, duke parë sjelljen që trajneri ka shfaqur ndaj tij. Vendimi i De Biasit në ndeshjen e fundit kundër Spanjës për ta dërguar lojtarin në tribunë e ka detyruar këtë të fundit që të ndërmarrë një vendim drastik për Kombëtaren.
Nga sa mësohet prej burimeve të gazetës brenda Kombëtares, lojtari ka bërë me dije që do të refuzojë ftesat e Kombëtares në të ardhmen për sa kohë trajneri i saj vazhdon që ta injorojë. Të njëjtat burime bëjnë me dije se lojtari nuk është ankuar asnjëherë për mosaktivizimin e tij, pra është treguar profesionist duke pranuar stolin, pavarësisht dëshirës për të qenë në fushë, por lënia jashtë protokollit zyrtar është konsideruar e tepërt nga ana e mesfushorit të Plzen.
Paraqitjet
Ergys Kaçe ka zhvilluar 6 ndeshje me skuadrën e Plzen që nga fillimi i muajit shtator deri në grumbullimin e fundit të kuqezinjve. Lojtari është aktivizuar 180 minuta në dy ndeshje të vlefshme për Europa Ligë, një prej të cilave kundër Romës. Gjithashtu, ka zhvilluar 224 minuta në kampionatin çek me Plzen dhe 46 minuta në ndeshjen e Kupës së Çekisë, ku edhe ka shënuar golin e tij të parë me këtë skuadër.
Aktivizimi
Ergys Kaçe është aktivizuar për herë të parë në ndeshje zyrtare me Shqipërinë në barazimin 1-1 kundër Norvegjisë, në 7 qershor të vitit 2013. Ai është aktivizuar në minutën e 85-të takimit, vetëm që të regjistrohej një paraqitje zyrtare me kuqezinjtë, përveç minutave që kishte luajtur në ndeshje miqësore.
PanoramaSport/d.i.
