Sandokan ishte i dashuruar marrëzisht me Marianën, aq sa rrezikoi edhe jetën shumë herë për të. Por, në jetën reale, Kabir Bedi, aktori që luajti “Tigrin e Malajzisë” në vitet ’70, nuk mund të qëndrojë me një femër të vetme.
70-vjeçari ka bërë të ditur se dy javë më parë është martuar për herë të katërt.
Aktori indian e bëri të ditur lajmin direkt në televizionin italian Canale 5, në programin Domenive Live, duke rrëfyer se gruaja e katërt, Parveen, është rreth 30 vjet më e re.
“Kam njëzet vjet që festoj 50-vjetorin”, tha me të qeshur aktori. “Martesa ishte surprizë e madhe për të gjithë miqtë e mi. I ftova për ditëlindje dhe aty u thashë se isha martuar një ditë më parë”.
Drejtuesja e programit, Barbara D’Urso, nuk humb rastin t’i kujtojë adhurueset e shumta që janë dashuruar me personazhin e luajtur prej tij dhe me të personalisht, përfshirë Romina Power, nga e cila transmetohet një video-mesazh me një puthje. Edhe Barbara D’Urso e merr puthjen e saj.
“Kujdes, kjo është shumë e rrezikshme për mua, sepse pas gruas së katërt nuk dua një të pestë”. D’Urso e qetëson: “Unë jam martuar vetëm një herë, po më mjaftoi. Eksperiencë shumë e keqe”.
Pas puthjes, në studio hyn Parveen.
“Shumë e bukur”, thotë D’Urso.
Bedi e korrigjon: “Më pëlqen inteligjenca e saj, këshillat… shumë gjëra”.
Pastaj tregon: “Ishim bashkë prej dhjetë vjetësh. I kërkova të martoheshim pas katër vjetësh, në Romë, në shkallët e Piazza di Spagna, por duhej bindur familja, sepse unë kisha tri martesa pas krahëve. Nuk ishte e lehtë”.
