Nga Ben Andoni
Po të dëgjosh Ramën dhe Bashën, Shqipëria është një vend, ku ekonomia s’është fushë për t’u folur. Prej disa ditësh ndërsa PS-ja është shpërndarë në të gjithë vendin me të ashtuquajturat “dëgjesa publike”, PD-ja po bën minifushatën e saj, por këtë herë për kreun e partisë. Në këtë të fundit ende pa u bërë analiza e humbjes, që me të drejtë kandidati për kryetar Eduart Selami e përmend shpesh, po kërkohet timoni i ri. Sa për ekonominë, ajo përmendet pak ose aspak. Ndërkohë që Rama e ka harruar fare ekonominë e dobët dhe premtimet e pambajtura, që po vishen me një kopertinë të bukur pas fitores së radhës në zgjedhjet parlamentare.
Ekonomia shqiptare, ndërkohë, po vuan modelin e saj ekonomik të padefinuar, ku një peshë specifike të madhe në ditët tona e ka marrë në të gjithë strukturën e saj kultivimi i hashashit. Paçka se mungojnë të dhënat, kjo e fundit, ka shndërruar gati krejt modelin tonë ekonomik në këto kohë. Ndërkohë që turizmi kombëtar, i cili ka arritur në 7 % të GDP-së ende përballet me vështirësitë e një dege ekonomike, që drejtohet në mënyrë kaotike dhe vetëm në pak muaj në vend.
Moszgjidhja e problemit të pronës dhe parcelizimi i tokës bujqësore, shtuar me mungesën estandardizimit dhe e ekonomisë bujqësore të përmasave më të mëdha e bën të vështirë investimin e madh.
Nga ana tjetër, investitorët e huaj në Shqipëri vazhdojnë të përballen me probleme. Nëse rrahja e biznesmenit arab ishte incidenti që do të tregonte klimën e frikshme fizike dhe kaosin e pronave, Dhoma Amerikane shpesh ka treguar hapur se klima në përgjithësi për investitorët e huaj nuk është pozitive dhe madje në takimin qoftë me Ramën por edhe me kryetarin e opozitës Basha u është përballur pa doreza realiteti. Dhoma Gjermane e Industrisë dhe
Tregtisë ka qenë dhe më e ashpër, kur në materialet e saj ka rrëfyer pak kohë më parë se Shqipëria renditet e fundit si destinacion ku gjermanët do të investonin sërish, si dhe e parafundit në rajon për tërheqjen si drejtim investimesh.
Larg këtyre, po shuhen pak nga pak bizneset e vogla, pasi nuk e përballojnë dot më presionin e supermarketeve. Por duke marrë parasysh se vetëpunësimi është më i madh në to, atëherë bindesh se Shqipëria po përballet me shqetësime dhe do ketë edhe më shumë siklete në të ardhmen. E në të gjithë këtë, nëse do të shtosh dhe trendin rënës të reminetancave, atëherë bindesh se gjërat në Shqipëri janë shumë larg parashikimeve.
Megjithatë këto nuk përmenden, por në vend të tyre Shqipëria konsumon politikë dhe vetëm politikë, sikur të ketë qëndrueshmëri ekonomike dhe mirëqenie. Sa i përket ekonomisë dëgjohet ndonjëherë ndonjë zë ose në emër të tij flitet sa për sy e faqe, sepse politikanët janë shpërndarë thjesht në dëgjesa publike. (Javanews)
