Burime nga grupi i hetimit që po verifikon origjinën e 863 mijë eurove të kapura të Orest Sotës bëjnë me dije se prokurorët e Krimeve të Rënda gjatë këtyre ditëve janë përqendruar te lidhjet e mundshme mes biznesmenit dhe ish-ministrit të Brendshëm Saimir Tahiri.
Nga informacioni në rrugë jo zyrtare Shqiptarja.com mëson se nga verifikimet e kryera në sistemin TIMS që kjo prokurori ka ngritur pretendimin se nga pika e Muriqanit ka dalë me makinën e tij Orest Sota. Po të njëjtat burime pretendojnë se kanë zbuluar që nga kjo pikë në të njëjtën ditë ka dalë me makinën e tij edhe ish-ministri i Brendshëm Saimir Tahiri. Nëse prokurorët kanë mbërritur në këtë përfundim atëherë jemi përballë një kontradikte të madhe e cila mbetet për t’u sqaruar.
Publikisht kohë më parë ish ministri Saimir Tahiri ka deklaruar se nuk ka në pronësinë e tij asnjë makinë. Ndërkohë ngrihet edhe një tjetër pretendim nga prokurorët se nga verifikimet në TIMS është zbuluar se në kthim, ish-ministri i Brendshëm Tahiri ka hyrë në territorin shqiptar nga pika kufitare e Muriqanit, duke përdorur automjetin në pronësi të Orest Sotës.
Ndërsa ky i fundit sipas burimeve nga prokuroria ka hyrë në territorin shqiptar nga pika e Murriqanit duke përdorur automjetin e Saimir Tahirit. Pritet që në ditët në vijim prokuroria të kryejë dhe një sërë veprime të tjera shtesë, pasi tashmë në këtë hetim është angazhuar dhe Drejtoria e Policisë së Qarkut Durrës. Nuk dihet ende përse është përfshinë kjo drejtori në këto hetime.
Nis hetimi pasuror për Sotën, sekuestrohen bilancet e kompanive
Ndërkohë që sekuestrimi i 863.100 euro në Elbasan, ka bërë që hetimet e prokurorisë së Krimeve të Rënda të rakordohen dhe me veprimet hetimore shtesë nga policia e qarkut të Elbasanit. Drejtuesit e Krimeve të Rënda të cilët po drejtojnë hetimin ndaj 25-vjeçarit Orest Sota dhe ish-ministrit të Brendshëm Saimir Tahiri, kanë thirrur sot në mesditë drejtorin e komanduar të policisë së Qarkut Elbasan Altin Qato, për të zhvilluar një analizë lidhur me veprimet hetimore që do kryhen për këtë çështje në ditët në vijim, pyetja e personave dhe punimi në rrugë operative për të mundësuar se ku ka qenë destinancioni final i shumës prej 863.100 mijë euro.
Mësohet se Qato do jetë pjesë e analizës që po zhvillohet mes prokurorëve, duke marrë dhe detyra konkrete hetimore, të cilat duhet të kryhen nga strukturat e policisë së Elbasanit. Ndërkohë gjatë ditës së sotme, Krimet e Rënda ka sekuestruar bilancet e kompanive që administrohen nga 25-vjeçari Oresti Sota dhe babai i tij Lefter Sota.
Këto bilance vjetore do monitorohen nga ekspertë kontabël të cilët pritet të paraqesin një raport financiar në prokurori, duke rakorduar të ardhurat dhe shpenzimet e bizneseve të familjes Sota. Nga këto bilance, do të kuptohet nëse kompanitë e familjes Sota kanë gjeneruar të ardhura që të justifikojnë shumën prej 863.100 mijë euro ose jo. Kjo pjesë tashmë i ngelet hetimit për të zbardhur të vërtetën./Shqiptarja
