Nënkampioni nga sezoni i kaluar i Ligës së Kampionëve, Juventus, është kualifikuar në fazën direkte të kësaj gare, pas fitores prej 1-0 kundër Manchester Cityt, në ndeshjen e xhiros së pestë në kuadër të Grupit D.
Ishte një fillim i fortë në mesfushë nga të dyja skuadrat me pak raste shënimi dhe me kujdes për të mos pranuar gol. Porse, pas një aksioni të bukur, Bianconerët ndëshkuan kundërshtarin e tyre që në periudhën më të madhe të kohës i mbajti nën presion.
Pogba e mori topin në mesfushë, pasoi të Alex Sandro, i cili dërgoi një superharkim në zonë dhe Mario Mandzukic nuk e pati të vështirë të realizonte (18’).
Pas golit të shënuar, bardhezinjtë u treguan të rrezikshëm në disa raste, por jo edhe efektivë. Duarkryq nuk qëndruan as mysafirët, të cilët rastin më të mirë e patën pas një gabimi të Marchisios, i cili ia ktheu topin Agueros, por argjentinasi nuk mundi ta kalojë i vetëm Buffonin.
Në pjesën e dytë, Zonja e Vjetër e dominoi në tërësi takimin, me lojë të bukur, dinamike dhe duke krijuar raste të njëpasnjëshme. Porse konkretizimi gjithmonë mungonte.
Shansi më i mirë i kësaj gjysmëloje ishte kur Morata paraboloi drejt portës, ndërsa Sturaro e goditi vetëm shtyllën. Një mundësi ëndrrash e krijoi vet Morata duke kaluar disa lojtarë kundërshtarë, porse në fund u ndal nga Hart.
Kjo fitore e pozicionon Juventusin në vend të parë në grup me 11 pikë dy më shumë se Manchester City dhe xhiroja e fundit do të vendosë se cila nga këto skuadra do të kualifikohet nga kreu.
Në ndeshjen tjetër të Grupit D, Borussia Moenchengladbachu e ka shkelur Sevillan me rezultat 4-2 dhe ka gjasa reale që të kualifikohet në Europa League. Granit Xhaka ishte asistues në golin e parë. /Telegrafi/
