Juventusi fiton kupën e dhjetë të Italisë në historinë e saj, edhe pse me shumë mundime. Janë dashur 120 minuta lojë për të përcaktuar fituesin në ndeshjen finale Juventus-Lazio.
Gjithçka ka nisur shumë shpejt teksa në minutën e katërt, Lazio e gjen veten në avantazh falë një goli të Radu. Por vetëm pak minuta më vonë do të ishte Chiellini që do të barazonte shifrat.
Pjesa tjetër e ndeshjes është me dy ekipe mjaft të kujdesshme që hezituan të sulmonin. Megjithatë në minutën e 98 të kohës shtesë, Matri do t’i jepte avantazhi kampionëve të Italisë, të cilët administruan mjaft mirë minutat e mbetura të ndeshjes.
Në këtë mënyrë, pas kampionatit, Juventusi arrin të fitojë edhe trofenë e dytë për këtë sezon, dhe Kupën e dhjetë të Italisë në histori. Ky është një rekord në Itali, teksa bardhezinjtë do të duhet të luajnë edhe finalen e Ligës së Kampioneve më 6 Qershor ndaj Barcelonës.
