Juventus dhe Dybala janë vetëm një hap larg njëri-tjetrit. Kjo është ajo që bëhet e ditur nga mediat italiane dhe konfirmohet edhe nga drejtuesit e të dyja ekipeve.
Sipas gazetave të përditshme italiane, kampionët e Italisë kanë arritur një marrëveshje me Palermon në shumën e 30 milionë eurove. Në këtë mënyrë Dybala do të vishte fanellën bardhezi vitin tjetër. Këtë javë pritet takimi që do të vendosë të zezën mbi të bardhë ndërmjet Drejtorit Sportiv të Juventusit Giuseppe Marotta dhe Presidentit të Palermos Maurizio Zamparini.
Pavarësisht se pretendimet e këtij të fundit ishin për 40 milionë euro, është vetë 21 vjeçari argjentinas që kërkon të luajë me kampionët e Italisë.
Kjo do të ishte edhe goditja e parë në merkato për Juventusin në një kohë kur sezoni nuk ka përfunduar dhe kur ka edhe gjysmëfinalen e Ligës së Kampioneve për të luajtur përballë Realit të Madridit.
