Dalin detaje të reja nga hetimet e kryera lidhur me rrëmbimin dhe vrasjen e Jan Prengës, ngjarje e ndodhur më 17 janar.
Pjesë e dosjes hetimore është një bisedë mes të dyshuarit Dritan Rexhepi dhe familjes së Prengës dhe më konkretisht vëllanë e tij Ndrek Prenga.
Në komunikimet me familjarët e të rrëmbyerit Rexhepi premtoi se do e lironte pengun, sapo ti dorëzohej kokaina që mbante peng vëllai i Janit, Astrit Prenga.
Astriti kthimin e drogës e bëri tek disa persona nga Polonia dhe më konkretisht 150 kg kokainë dhe 700 mijë euro.
Pas kësaj Ndrek Prenga i telefonoi Dritan Rexhepit dhe i kërkoi se pse nuk është liruar pengu.
Rexhepi, i tha se “Ata më kanë lëvizur nga fjala. Por duke qenë se të kam dhënë besën, po të jap emrat e atyre që e kanë marrë peng vëllain tënd”, ka thënë Rexhepi, në bisedën me Ndrek Prengën.
Mirëpo duket se situata ka dalë nga kontrolli dhe Prenga nuk u kthye më në familje, madje prej tij nuk ka gjurmë nga trupi.
Nga hetimet e policisë është zbuluar se porositësi është vlonjati Dritan Rexhepi, i cili ndodhet në një burg të sigurisë së lartë në Ekuador.
Rexhepi i cili njihet edhe si Gramoz Rexhepi, rezulton në kërkim edhe nga autoritetet shqiptare, i dyshuar për vrasjen e dy policëve në Krujë, ku më tej u arratis.
Pikërisht Rexhepi mendohet se është “truri” i organizatës kriminale që merrej me trafik droge, i cili bëri bashkë pjesëtarët nga Shijaku me ata nga Shkodra dhe Vlora.
Dyshohet se pengmarrja e Jan Prengës ka ndodhur pasi i vëllai Astrit Prenga i cili jeton në Angli, nuk ka dorëzuar një ngarkesë kokaine.
Të dyshuarit kryesorë janë Altin Hajri nga Shijaku, Dritan Rexhepi nga Vlora dhe M.Bajri nga Shkodra.
Këta emra janë zbuluar bazuar në përgjimet telefonike të familjarëve të Jan Prengës me vëllanë e tij Astritin, i cili duket se është bërë sebep për vrasjen e të vëllait.
Rexhepi, rezulton se monitoron trafikun e kokainës nga Ekuadori drejt vendeve të Bashkimit Europian dhe si bashkëpunëtorë të tij janë Hajri dhe Bajri.
Po ashtu prokuroria ka zbardhur dhe dëshminë e gruas së Altin Hajri, një i shumëkërkuar si ‘truri’ i rrëmbimit të Jan Prengës. Ajo pohoi se burri i saj ishte kthyer në Shqipëri në 30 dhjetor të 2019-ën, pasi kishte qëndruar dy vite në burg në Holandë. Kujtojmë se për ngjarjen në fjalë janë arrestuar 5 persona, Bajram Hajri, Leonard Hajri, Elton Hajri dhe Olsi Turja si dhe Festim Bexhdili.
Elton Hajri Jan Prenga
Dritan Rexhepit Jan Prenga
Jan Prenga
g.kosovari
