Fiks pas një muaji, më 24 maj, të gjithë nxënësit që përfundojnë ciklin e parë shkollor të detyrueshëm, atë fillor, do t’i nënshtrohen testimit kombëtar.
Për një orë e 30 minuta, nxënësit do t’u përgjigjen 50 pyetjeve në tri lëndët bazë përgjatë pesë vite shkollim: Gjuhë shqipe, Matematikë dhe Dituri natyre.
I nisur që në 2015-ën, fillimisht si projekt pilot në disa shkolla të Tiranës për t’u shtrirë më pas në të gjithë Shqipërinë, provimi synon të njohë Ministrinë me nivelin e arritjeve të një grupi në përmbyllje të një cikli shkollor.
Edhe pse monitorimi do të jetë i rreptë si provimet e minimaturës, vlerësimi i tezave nuk do të bëhet me nota, por me pikë, shkruan panorama.
Qëllimi është njohja e shkallës së analfabetizmit funksional në rang vendi, rolin e punës së mësuesve në çdo shkollë dhe orientimin e politikave arsimore në shkollat më problematike.
Edhe pse ka vite që zhvillohet si provim, niveli i arritjeve nuk është pasqyruar çdoherë në media. Pas kësaj, do të jetë PISA, vlerësimi i arritjeve në rang ndërkombëtar që shpalos dijet reale të nxënësve, duke i krahasuar edhe me rajonin e më gjerë. Herën e fundit, Shqipëria shënoi progres, por vijon të renditet në fund të listës.
g.kosovari
