Ministri i Brendshëm Saimir Tahiri ka paralajmëruar se muajin e ardhshëm do të nisë fushata e sensibilizimit për mos përdorimin e celularëve gjatë drejtimit të makinës, në kushtet kur edhe për këtë veprim, njësoj si për rripat e sigurimit, masa e gjobës do të rritet në mënyrë të konsiderueshme.
“Nga muaji tjetër policia rrugore do nisë masa paraprake sensibilizuese për përdorimin e celularit gjatë drejtimit të automjetit. Duhet ndryshuar kodi rrugor duke u shtuar masa e gjobës deri atëherë do të aplikojmë masën e sotme maksimale të gjobës… Çdo person me celular në dorë duke drejtuar makinën është rrezik për shoqërinë. Do e quajmë si stacionin e dytë, gurin kilometrik të dytë për të arritur gjiçka që është e mundur që rrugët tona të jenë të sigurta”, tha Tahiri.
Tahiri ka sqaruar gjatë vizitës së tij në komisariatin e Policisë Rrugore se me ndryshimet e reja për gjobat e rripit, janë shpëtuar brenda muajit 9 jetë personash.
“Ishte një masë e domosdoshme. Policia Rrugore do vijojë në forcimin e kësaj norme që qytetarët të vendosin rripin e sigurimit. Ajo që është e rëndësishme ka të bëjë me mundësinë që kemi ne për të shpëtuar sa më shumë jetë. Falë kësaj fushate kemi shpëtuar 9 jetë njerëzish vetëm këtë muaj, krahasuar me një vit më parë edhe me gushtin. Kjo është një pasuri shumë e madhe. Përndryshe nëse do vazhdonte kaosi i 20 viteve dhe marrëdhënia e çalë më policit dhe qytetarit do kishim kosto në shëndetësi dhe në jetë. Çdo rregull vlen për të shpëtuar një jetë, vlen për të kursyer shëndetin. E domosdoshme që të bëjmë gjithçka të jetë e mundur. Policia Rrugore do vazhdojë me rripin e sigurimit. Do vazhdojmë të kërkojmë nga drejtuesit respektimin e kodit rrugor”, tha Tahiri.
Tahiri nuk i është përgjigjur pyetjes së gazetarëve në lidhje me reportazhin e publikuar dje në media, të gazetarit italian të RAI-t, në lidhje me kanabisin në një zonë të Krujës./java/a.k
